يحليلهم المدرسين – محد يتعب كثرهم !

كل ما فتحت موضوع العنف ضد الطلبه والعنف يشمل الضرب بما فيه الدح اضافة إلى الشتم والاهانة ينط لي مدرس ويقول أنت تتكلم لأنك مب في الميدان ، وبعدين مثل ما تتكلم عن معاناة الطلبة تكلم بعد عن معاناة المدرسين !

هيه وحليلكم أكيد أيديكم تعوركم يوم تدحون الأطفال ، يعل أيديكم الكسر واللي بيزعل يزعل ، واللا يوم تصرخون يحليلكم أكيد بلعومكم يعوركم وما بتقدرون تسرطون سندويشات الفلافل … يحليلكم صدق مساكين !

كسرتوا خاطري لدرجة اني بتكلم عن معاناتكم … واللي اتمنى انكم تتقبلونها بصدر رحب ! واللا بتدحوني أنا بعد … خاطري أسير عند مدرس يدح وادحه كم دحه لين يعرف إن الدح مثل الضرب بعد يعور !

المهم معاناة المدرسين :

• المدرسين يداومون ساعات طويلة وموظفين الحكومة والقطاع الخاص يداومون نص اسبوع بس!

• موظفين الامارات يداومون ٧ ساعات في اليوم وما عندنا مثلا حصتين والباقي نيلس دق سوالف في غرفة المدرسات!

• المدرسين ياخذون بس ثلاث شهور وكل صيف اجازة بينما بقية الموظفين محظوظين ياخذون بس شهر واذا حصلوا الصيف نعمة وبركة!

• المدرس يتعامل مع مفتشين شديدين ما في مثلهم ، والله عندنا مدراء نتعامل معاهم كل يوم يخلون مفتشينكم تلاميذ حضانه ، أوه نسيت يهال الحضانة شياطين عوذ بالله منهم !

• المدرس طول الليل سهران يصلح ويحضر لباكر ، ومنوه قال الموظفين ما يشتغلون في البيت يجهزون محاضرة أو يحهزون لاجتماع أو يراجعون مقترح مشروع !

• مب كل موظفين الحكومة محظوظين يالسين على كاونترات ما يرومون يتحركون منها ومطالبين بإنجاز معاملات في وقت معين ، وأكثرهم يداومون لين صلاة العشاء بعد ، لا وراتبكم اعلى منهم بعد !

• دوامكم تعب لازم تمشون من غرفة المعلمات للفصول ، مب مثل بعض المهندسين الجامعيين لي يداومون في الحر طول اليوم وأحيانا يسيرون طوارئ نص الليل!

ما ننكر انكم تجابلون وحوش طول اليوم يحليلكم والله صدق حرام شو رأيكم اطلبوا من الوزارة يردون الخيازرين علشان ما تتعب أيديكم من الدح … يعل أيد أي مدرس يدح الكسر … اللهم آمين!

ملاحظة: المدرسين اللي ما يدحون ولا يسبون انتم أيضا مجرمين لتستركم على جريمة من يدحون ، أنا اتمنى تكون عندك الشجاعة وتساعد أو تبلغ المدير عن المجرمين لأنك تعرفهم!

مع تحيات:
الــــــــوطــــــــن™

بواسطة الــــــوطــــــن™ نشرت في غير مصنفه

One comment on “يحليلهم المدرسين – محد يتعب كثرهم !

  1. ،،،، تسلم يالوطن على هذا الموضوووووع ،،،،
    ،،، كفيت و وفييييت ،،،
    صدق اجديت فيهم يستاهلون -_-”
    والا يتحرون الكل مرتاح وهم بس اللي يكرفون

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s