تعليمات مهمة للقيادة الآمنة في الضباب


أهم شي في الضباب هو انك تشوف علشان ما تدعم لي جدامك ، وتنشاف علشان السيارات الثانيه ما تدعمك

◄ لإزالة الرطوبة من النوافذ الداخلية للسياره شغل مكيف السيارة
بالطريقة العادية لي تشغله بها كل يوم واضبط الدرجه علي الدرجه اللي ترتاح لها وأغلق نوافذ السياره وفتحة الهواء الخارجي

○ صح هناك زر لإزالة الضباب في أغلب السيارات الحديثة
لكنه ما ينفع واحتمال يشغل الدفايه ويطلع هواء حار … فإذا سكرته بترجع الرطوبة بسرعة وخطورة شديده … ريح مخك وركز إلى الدرب وحل المكيف شغال

◄ شغل ليتات السياره وخلها على الأنارة المنخفضه يعني بدون ”ديم فول“
والفكرة مب علشان انك تشوف الطريق بوضوح لأن إنارة السيارة ما بتساعدك على الرؤية بشكل أوضح ولكن السبب هو علشان الناس الثانين يشوفونك وأنت تمشي وراهم وهم يشوفونك وما يدعمونك من ورا.

◄ ممنوع منعا باتا تشغيل الأنارة التحذيرية ”الأربع إشاير“
لمجرد وجود الضباب … شغلهم بـس إذا كان فيه حادث أو ان السيارات توقفت فجأة وتبغي تنبه اللي خلفك أنه فيه خطر !

◄ أترك مسافة كافية وأكبر من المعتاد لأن الشوارع زلقه
بسبب الرطوبه على الشارع فبتأخذ مسافة أطول للتوقف وبعد لأن لو لا سمح الله صار حادث أمامك ممكن تتفاداه بسهولة.

◄ أهم شي ركز على الدرب واترك الموبايل … الله يخليك.


مع ان حد منكم يعرف المعلومات لي قلتها لكن هناك وايدين ما يعرفون … وصلوا لهم المعلومة واكسبوا فيهم أجر.

مع تحيات:
الــــــــوطــــــــن™

10 تعليقات على “تعليمات مهمة للقيادة الآمنة في الضباب

  1. يعيطيك العافيه اخوي
    ماشاء الله عليك متجدد في المواضيع وماشي مع الاحداث، عشان جيه احب اقرأ الاحداث من عندك لدقة ومصداقية المواضيع.

  2. ليش ممنوع تشغيل أربع أشائر شو السبب؟!
    بصراحه أنا فالصباب حتى الليت الأحمر ما يبين أخاف ويوم أشوف سيارات مشغله 4 أشائر أعرف مسار الطريق هههههه بس أنا ما أشغلها
    فالضباب الجامات الأماميه أتم رطبه وتعيق الرويه شو نسوي لا تقول بطلي الدرايش مأقدر أنا أخاف من شكل الضباب يدخل السياره ومايطلع

    والسموحه على الهذره

    • الإجابات على أسئلتك موجوده في التعليمات … انت قريتي الكلام قبل لا تطرشين لي واللا لا ؟

      لكن بالنسبة للأربع أشارات .. تعرفين كيف تستوي الحوادث قوم بو خمسين سياره .. تخيلي نفسك تمشين وتشوفين ناس مولعين أربع أشاير وتقولين في نفسك .. أوه زين الحين على الأقل أشوف الدرب واعرف وين أمشي .. لكن فعلا هم واقفين مكانهم وما يتحركون ولهذا السبب مولعين أربع أشاير .. وقبل لا تستوعبين الموضوع بتكونين دعمتيهم واستووا واحد وخمسين سياره … وضحت الفكره واللا لا !؟

      • هيه قريت أكيد قبل ماا أطرش آفا عليك

        وضحت لي الفكره الحين
        مشكور ربي يجازيك خير

    • لان الانارة المرتفعه تسبب انعكاس الانارة في الضباب وتسبب وهج او بهرة تعيق الرؤية وتجعل الموضوع اسوء ، إستخدام الإنارة في الضباب هي كما قلت في المقال هو لكي يراك الناس بوضوح لا لكي ترى أنت الطريق بوضوح

  3. مشكورين على النصايح صح فيه بعض الناس ما يعرفونها ، بس بغيت اسألك الظباب اللي فالجامة يوم اكون مشغل المكيف يروح وبعد فترة يرجع مع اني مسوي كل اللي قلت عليه ؟

    • العفو … لكن انت متأكد أنك تبقي على المكيف شغّال واللا تسكره بعد ما تحس ببرد … وهل انت متأكد من طريقة عمل مكيف سيارتك ، لأن بعض السيارات تدخل هواء من الخارج بعد دقايق من تشغيل المكيف ووصوله لدرجه البروده المطلوبه

  4. يزاك الله خير أخوي ع النصائح الهادفة.

    أنا طبقت كل شيء قلته. إلا شيء واحد. لما تكون لفة. أخاف واايد. واضطر أفتح الجامة. أخاف أدخل الشأرع وتكون سيارة ياية وأنا ما شفتها من الضباب. هل اللي أسويه صح. ؟.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s