أنا محتاج مساعتكم لو سمحتوا لحل أكبر مشكلة تواجه الكل في الضباب – منو مستعد يساعد؟

هالكم يوم الجو ضباب الصبح وأنا محتاج مساعدتكم
منوه مستعد يساعدني لحل أكبر مشكلة تواجه السائقين في الضباب والسبب الرئيسي للحوادث … لا من الاربع اشاير … اللى مستعد يرفع ايده

صار لي ٢٠ سنة أقول للناس لإزالة الضباب من على النوافذ ”داخل“ السيارة يجب أن يشغلوا المكيف ووضعه على الدرجه اللي يرتاحون لها وبيختفي الضباب اللي ”داخل“ السيارة لكن للأسف محد يصدق! ليش ما يصدقون ! الله أعلم ! وليش حتى ما يجربون ! بعد الله أعلم !

اللي يسوونه الناس هو انهم يا أما يشغلون الدفايه ويحطون الهواء الحار على الجامه الأمامية وصح يختفي الضباب … لكن يستوي حر ويضطرون يسكرون الدفاية ويفتحون الدريشه وبعد ثوان تستوي المشكلة أكبر من قبل وتعتمي الدرايش … ويضطر السايق طبعا في هذه الحالة لاستخدام غترته أو أي شي ممكن يستخدمه!

أو حد يشغل المكيف على الهواء البارد لكن بعد يخلي الهوا يدفع على الجامه الأمامية من الفتحات اللي في الطبلون وهنيه بيختفي الضباب من داخل السياره لكن أول ما يبرد ويسكر المكيف يرجع الضباب أسوأ من قبل!

الحين ممكن شوية تركيز والله أن الموضوع بسيط لكن مهم جدا !!!

رجاءً أفتح المكيف وخل الهواء يطلع من الفتحات العادية للمكيف مب من الفتحات اللي في الطبلون واضبط الدرجه على أي درجه ترتاح لها … وترا مب لازم درجة الحراره مال المكيف على الـ18 جرب مثلا 24 درجه زينة مب برد لكن بعد مب حر وخل المكيف يشتغل أو حط المكيف على أي درجة لكن المهم خل المكيف شغال طول الوقت لا تسكر المكيف … وبيختفي الضباب الداخلي من على نوافذ السياره الداخلية.

ولا تنسى بعد تخلي ليتاتك مفتوحه والفكرة مب علشان تشوف أحسن بالليتات في الضباب ، لكن علشان الناس يشوفونك بوضوح وما يدعمونك بالغلط …. خل الليتات شغاله لين ما توصل دوامك أو مدرستك أو جامعتك!

شغل الليتات اللي تحت ولا تفكر تشغل الفول ليت (العالي) لأنه الضباب بيعكسه وبيكون كأنه جدار أبيض أمامك وبالتالي بتقل الرؤية أكثر وتسبب ارتباك … الضباب بطبيعته يكون بينه وبين الأرض مسافة بسيطه يكون فيها شبه معدوم ومن هنا أتت فكرة ليتات الضباب الأمامية تكون تحت.

أهم شي ممكن تطرش المسج لكل اللي تحبهم وتخبر أي حد تعرفه عن هذي المعلومة اللي يجهلها 99% من السواقين!

اتمنى لكم قيادة آمنة في كل الأوقات.

مع تحيات:

الــــــــوطــــــــن™
اتبعني Follow @AlWatanUAE
http://www.alwatan.ae

Advertisements
بواسطة الــــــوطــــــن™ نشرت في غير مصنفه

8 تعليقات على “أنا محتاج مساعتكم لو سمحتوا لحل أكبر مشكلة تواجه الكل في الضباب – منو مستعد يساعد؟

  1. مرة شفت هندي في شارع المطار .. واقف وداق اربع أشاير ويمشش الجامه .. نزلت له وفجيت الباب وشغلتله المكيف .. عقب دقيقتين نظفت الجامه .. وأنا نازل قالي .. “انته شو يسوي .. كجره كيف روح”

  2. أنا فكرت بطريقة ان أمكن تنفيذها من قبل الحكومة الرشيده وهي مكلفه نوعا ما ولكن لو حسبنا تكاليف الحوادث والنتائج المرتبة لوجدناها أقل تكلفة مثلا تركيب مراوح على طول الشارع ولا سيما الشوارع الرئيسية جنب كل إضاءة أو على جانبي الطريق وتكون بحجم أكبر مثل مولدات الطاقة والتي تعمل عن طريق الرياح ومهمتا سحب الضباب للخارج وبعيد عن الشارع بحيث تسمح للسائقين الرؤية بوضوح والوصول الى المكان المقصود بكل سلامه دون حوادث أو مكروه والرياح عامل مهم ورئيسي لإزالة الضباب. وإذا توجد أفكار أخرى وبسيظه فساركونا باراءكم الطيبه علا عسى تنفذ الفكره ونجد الحل الأمثل لها. وشكرا لكم أخوكم إبراهيم الطنيجي

    • هذي الفكره ما تنفع لأنك بتسحب الضباب لي في الشارع لكن بتيب ضباب من برع الشارع وبيدور في المكان اللي سحبت منه الضباب .. فالضباب موجود كل مكان … الحل الوحيد هو في التوعيه … شغّل المكيف !!!

  3. انا عندي مشكلة عندي الزجاج الخلفي كيف اخلي يرحو سيارتي كورلا 2013 ابي اعرف اشغل مكيف او تساخينة

  4. السلام عليكم. اليوم الضباب فراس الخيمه ماشاء الله كان وايد. وطبعا من شفت الضباب طرشت التعليمات هذي للسته عندي وجربت طريقه المكيف والحمدلله.بس بعد موضوع دبل الاشاره ابدا ماشي فايده الكل كان مشغل. وأختي اول ماشافت هالاشاير قالت خف يمكن في حادث

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s