الـ”ڤان“ Van … مب للمواطن

سياره تحتاجها أغلب العوائل الاماراتيه وتبدأ بعض أنواعها من 70 ألف وتشل 9 ركاب …هذا اضافه إلى مكان يكفي لست شنط سفر بدون طي الكرسي الأخير … عكس السيايير الفورويل مثل التاهو النيسان بترول أو التويوتا شتيشن إذا حد يلس على الكرسي الثالث معناته خل الشنط في البيت

طبعا ما بنقارن بين أسعار الفان وأسعار الفورويل أرخص واحد وهو التاهو اغلى من أي فان تقريبا

وطبعا الفان ما يمشي في الرمل وبهذا يتساوى مع النيسان اليديد والاستيشن والتاهو … كلهم حاليا سيايير مال شوارع مب مال برور ونص بديهم بلاستيك … حتى الاف جي بمبره بلاستيك … المهم الفان ما يمشي في البر … بس فعليا كم واحد مأخذ سياره فورويل للبر … الأغلبيه ماخدينها لأنها تشل ركاب … يعني باص فورويل وغالي

طبعا أنا ادري ان أغلب المواطنين ما يقدرون يسوقون فان لأن البريستيج يمنعهم ، لكن 8 مواطنين يتراصون في بورش كايين عادي … ولو ما شفت بروحي ما كنت بصدق !

المهم هناك فان مرسيدس وهناك فولكسواجون وهناك أيضا هايونداي H1 فان وهذا سعره ٧٠ ألف درهم فقط … وهو أفضل من البقية الأغلى وبهذا السعر فهو في متناول الجميع تقريبا … طبعا لي همهم الخقه هذا الموتر مب لهم … حتى لو كانوا يحتاجونه … منوه يعلم بورش سوو صالون غالي … يمكن باكر يسوون بورش فان يناسبكم !

هذي صور للهايونداي H1 … مب دعايا لأني مالي مصلحه لكن يمكن حد يحتاج موتر وميزانيته محدوده !

للعلم عندنا في العائلة اثنين من هالموتر لأنه عملي وما في مثله في السوق ومع ان اخوي عنده همرH2 لكن معظم طلعاته في الهايوندايH1 !

مع تحيات:
الــــــــوطــــــــن™
@AlWatanUAE
www.alwatan.ae

Advertisements
بواسطة الــــــوطــــــن™ نشرت في غير مصنفه

8 تعليقات على “الـ”ڤان“ Van … مب للمواطن

  1. سيارة حلوة وشكلك اقنعتني فيها من بأجر بروح. الوكالة بسأل عنها

  2. هذي السياره مال الملباريه تبانا أنركب فيها عيالنا ياهي فضيحه محد بيحترمك في الشارع يوم بتسوق هذي السياره كيف يوم بيونا أضيوف يشوفون هذي السياره واقفة في الكراج .. وكيف بينزلون المدرسه وهم راكبين هذي السياره بينفضحون بين الأولاد والبنات .. أنته أكيد مب صاحي .. ولا يوسف حبيب اليوسف يقربلك .. وتبا أتمشي سياراته

  3. بصراحه السيارة مريحه وايد ووسيعة، استخدمناها في سفرتنا هالصيف في اوربا، بس ما اعتقد الشباب بيشترونها لانها عائلية اكثر، واللي بيشتريها اكيد ما بيسوقها هو شخصيا بيخليها للبيت والدريول يسوقها، او ان بيفتح له باب رزق ويوصل الحريم والبنات للمدرسه لانها وسيعه وتشل اكثر عن 9 بعد، بس عندهم ف اوربا لازم 9 وبس.

  4. الملبارية مب بشر يعني !!!!
    سبحان ٱللـًﮧ مع كل النعم اللي موجوده بين ايدنا للاسف الاغلبية كافرين بهاي النعم ، واظن انك واحد منهم ..
    اشكر ٱللـًﮧ ع هاي النعم قبل ما تختفي هاي النعم وتروح تدور الرزق في الهند مثل زمان الاول

  5. كنت أريد اسألك عن هذا النوع من السيارات إذا عندك فكرة لانى أريد اشتريها
    بالنسبه لقطع الغيار هل هى متواجده وأسعارها حلوه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s