ليش لازم موتر غالي … ولو تم الجيب فاضي!؟

مثل ما تفضلتوا من قبل هنيه وأغلبكم اعترف بكل صراحه ، وحسب ما هو واضح من الدراسة المنشورة جريدة البيان اليوم … ان أكثر صرف المواطنين على السيايير الغالية

أحيانا تكاليف السيارات اللي يشترونها المواطنين على مدى عشرين سنه مثلا تفوق سعر بيت الأحلام … ويمكن توصل لسعر أكثر من بيت أحلام
السؤال اللي يطرح نفسه … لـــــيـــــش ؟
وفي انتظار مشاركاتكم الجميله الصادقة هنا

أتمنى المشاركات ما تكون خطب ونصائح … أنا ابغي أعرف ليش أنتوا تشترون مواتر غالية … مشكلتنا دائما في الإمارات … ان من أنا … هذاك هو اللي يسوي ويسوي ويسوي واللا أنا لا …..

فاكتفينا من الخطب بعرض فقط الحالات الشخصية … يعني واحد شجاع بيقول أنا اشتريت موتر قو لأني ابغي اكشخ وما يتمني ان الجيب فاضي … أو مشاركة لها قيمة غذائية !!!

(الاسم والبيانات الاخرى مب الزامية للمشاركة)

مع تحيات:

الــــــــوطــــــــن™
اتبعني Follow @AlWatanUAE
www.alwatan.ae

Advertisements

23 تعليقات على “ليش لازم موتر غالي … ولو تم الجيب فاضي!؟

  1. الصراحة مع احترامي للي يقترضوا لاجل شراء سيارة سعرها فوق 100 الف وهو راتبه مايزيد عن 20 الف الصراحة مافيه مخ

    يعني تقدر توفر مبلغ 10 الاف كل شهر لمدة معينة وبعدها تقدر تاخذلك سيارة

    وبالاساس لا يكلف الله نفسا الا وسعها

    ليش اخذلي سيارة فوق 100 الف مع اني ماقدر

    وليش اقترض وادخل في حسبة الفوائد والربا التي تمارسها البنوك

    قاعدة دام انك اقترضت فانت عبد للبنك وكل ماتزيد ديونك تزيد عبوديتك للبنك

    الله يبعدني عن البنوك وعن هالاشياء

  2. مع الأسف عشان المظاهر والخقه وخاصه اللي توه مداوم أول شيء يفكر فيه موتر كشخه عشان الكل يرابعه ويقولون عنه شي … واذا حد بينصحهم بيردون يقولون خلونا نعيش حياتنا ونستانس

    والمشكله لما تشوفه بالشارع يسوق ع سرعة 80 ع السيد السريع وتلاقيه معاند عشان موتره كشخه

  3. صح ان بعض الشباب يبالغون في شراء سيارات غالية الثمن .
    طيب سوال : ليش مايكون حد لسعر السيارات
    اكثرنا مر في نفس الدرب وعرفنا بعد الزواج ان هذا غلط

    اتمني وضع حد من جشع التجار

    • في سيارات في متناول الجميع والأسعار متفاوته … مستحيل يعني بينباع الرنج بسعر الكورولا

  4. بختصار الشباب في تفاءل بينهم من بعد ما يشترو الموتر الغالي بأن الحكومه تساعدهم إذا طاحوو بالسجون من الدين

    أعقلوو يا ناااس الله يطول بعمار شيوخنا مب كل مره بسدوو إغلاطنا

    شيوخنا يبون يمدون أيدهم لشئ مفيد للناس والفقراء

    مب للبنووك وإغلاطكم

    لا حول و لا قوة إلا بالله

  5. تدين و تزين!!!

    للأسف كل ها بسبب المظاهر والبطرة الي مالها داعي.. وبدال الكلام الي فوق يكون مد ريولك على قد لحافك

  6. معظم الشباب يحبون الكشخه عسب جي
    وبعدين يشوفون ربعهم عندهم سيايير كشخه فأكيد ما يبون يحسون انهم اقل منهم
    بس مادري شو مستفيدين من هالشي
    ﺂﻟلّـۃ يعينا ؏ المظاهر
    والله يصلحنا واحوالنا ويهدينا يـا رب.

  7. صدقتي يا أم محمد في مد ريولك على قد لحافك
    المشكله كيف بتنصح عيال اليوم اللي توهم ظاهرين ع الدنيا ويدامهم هالمغريات كلها من البنوك وغيرهم
    الله يهديهم

    موضوع حلو وتسلم ع الطرح

  8. أنا برد رد بسيط وياليت الشباب يودرون عنهم الخقه والتباهي بالسيايير

    شُـو موقفك وانت واقف في شيشة البترول وراكب سياره فارهه ومتخقق قدام البنات وتمد يدك من الدريشه وتطلع 10 ربيات عشان تحط بترول

    وين الخقه وقتها يابو الشباب

    وعلى بالكم أن البنات يوم يشوفونك راكب سياره بماات الالاف بيطيحن عليك ههه تراهم يعرفون أنها مديونه للبنك

    وعلى قولة المثل تدين واتزين. هههههه

    فاعقل أحسن ورتب حياتك على حجم راتبك

    • توه جدامي واحد صب في رنج لـ ٤٠ درهم … أظن بيوصل الربع … يحليله … بس آخر الشهر ترانا … ما ينلام …… !!

  9. كل ما زادت رفاهيه المجتمع زادت المباهاه بينهم وأحيانا ينظر للسيارات الإقتصاديه والعمليه نظره دونيه وإستهزائيه لسائقها وبالأخص بين شريحه الشباب مما يدفع البعض منهم ومن أول راتب التوجهه لشراء النوعيه الفخمه من السيارات ، أحنا بحاجه ماسه لتغيير المفاهيم الإقتصاديه والتوعيه بإهميه المال ومجال إنفاقه وطبعاً يعودنا هذا للمدرسه والمنزل اللى هم بالأساس التغيير الحقيقى لفكر الأفراد ونشر الوعى بينهم بالسابق وما عندى فكره عن منهاج اليوم كانت هناك ماده (الإقتصاد ) طبعا ما اذكر شو فايدتها وﻻ حتى مجال تطبيقها على أرض الواقع علاقتنا فيها انتهت بلحظه خروجنا من لجنه الإمتحان …سبب اقحامى للماده التعليميه بموضوع السياره منطقى وفيه رابط لو كان بالفعل اللى درسناه آثر فينا كأفراد وغير من مفاهمينا يدل ذلك على النجاح الحقيقى للعلم أما الأنسلاخ الغريب بين ما نتعلمه وما يجرى بعد ذلك بحياتنا عليه علامات إستفاهم وفشل حقيقى وهدر للوقت .

  10. الجواب هو بسسب اهتمامهم بالمظاهر الخارجية غير هذا فيه منهم يتنافسون أنه فلان عنده سيارة كذا ليش ﺂنآ ما عندي ! أو لفت الأنظار فلان عنده السيارة الفلانية .. بالاختصار الأمر يتعلق بالمظاهر بشكل عام هذا لي أجوفه

  11. والله كثير من الناس فقد مفهوم شيء اسمه قناعة ومد الريول على قد اللحاف !
    تلاقي الواحد مشتري موتر مثل مأقلت وجيبه فاضي تهمه المظاهر فقط ولو يئت بحثت أحيانا على الانسان راعي المظاهر وهذا الكلام مايشمل الجميع تلاقي ماعنده فعلا فلوس ومدين على قد شعر رأسه
    ليش ؟
    ولاترموا بأيديكم الى التهلكة والله اعطانا مخ نفكر فيه وشو هيه المظاهر وليش وبأي حق ؟!! الاهتمام بالذات والمظهر شيء مطلوب لكن مب لحد الجنون كل شيء بالعقل حلو والوسطيه بكل شيء مطلوبه !
    والله أني أتكلم عن واقع أكثر الناس اللي ذابحتهم المظاهر لو شفنا حالتهم يعرون القلب من بين مفلس ومديون.!

  12. الحقيقة مرة صج تقريبا نص أو كامل الراتب يروح على السيارات غريبة.
    وأيي آخر الشهر ويقعد الشاب بلا راتب هِـٌـعٌِ. هههههه
    وإيقولون موضة ونواكب العصر بشو أتواكبون العصر بالخسائر.
    ونحن عندنا مثل أيقول. مد أريولك على قد لحافك.
    اتقي ٱللّھ بنفسك أيها الشاب خاف ربك سوف تحاسب بيوم الميعاد
    اتقوا ٱللّھ بأنفسكم

  13. السبب في وجهة نظري هو ألمغازل لأنه البنات مايسوون سالفه. حق المواتر الكجره…. بس حليلهم الشباب عقب ما استوت سالفة الأرقام المميزة فلازم الحين السلفيه أتكون عوده .. المفروض الحين البنات يحددون شو هوه الرقم الزين إلي إذا كان موجود على السياره بتاخذ الرقم .. عشان ايعرفون الشباب كم هيه السلفيه المطلوبه .. يعني لو البنات إشوي يقللون في. مواصفات الأرقام والسياير يمكن يرتاحون الشباب. وبيقل الطلب على شهادات المديونيه وبتخسر البنوك. وبينتعش الاقتصاد لأنه البنوك ستضطر لتمويل المشروعات بدل السياير وبتكثر فرص العمل وبتقل البطاله .. شفت كيف البنات هم أهم شي في المجتمع

  14. الشباب يدورون. الفخامه. و البنات لفة انتباه. و أهم من هذا. كله. نظره. الناس. للي.راكب رينج روفر أو بورش كأيين غير على إلي راكب هوندا و سني. و عقليات هالزمن. تحسب لنظرة الناس ألف. حساب

    أم مهره

  15. ما شيء موتر بنبأع بالرخص الحين والواحد يشتري سيارة زينة أحسن من انه يشتري سيارة تسير وطيح

  16. انا عمري 20 ومن شهرين خذت سياره اقساط على البنك مع انه كنت معارض لها الفكره وبشده
    لكن بخبرك شي الا وهو انك مهما حاولت تجمع حق سياره كشخه فجأه بتجوف الفلوس الي جمعتها
    انصرفت لانك احتجتها في شي ثاني خص لو كان عندك مسؤليات كثيره , لكن يوم بتاخذ قرض
    بتحاسب على مصاريفك ويمكن تتوهق اذا ما عرفت تتصرف زين

    وبعد ما كنت متوقع انه تكون رده فعل الناس الي حولي بتكون جذي صدقني وايد ناس تهتم بالمظاهر
    في مجتمعنا وانا ما كان عندي ربع وايد لكن بعد ما خذت ها الموتر اجوف الكل يعاملني بزين ويسوي
    لي قدر , والصراحه انا مب فرحان بها الشي لانه هذا يعني انا ما قدرت ااثر فيهم بشخصيتي او حتى ما حاولت ااثر فيهم

    صدق اني تقريبا مفلس الحين لكن بسبب اني دفعت تقريبا كل الي عندي دفعه اولى مع انه الدفعه الاولى كانت اقل من 25 الف بس اريد اتخلص من الدين بسرعه , يوم خذت ها الموتر كنت افكر ف موتر حق استخدام خمس سنين جدام وما يحتاي ابدله ويكون كشخه وجي وكنت حاط حدود لسعره

    طبعا في مليون سبب وظرف تخلي الشخص الاماراتي ياخذ قرض عشان سياره كشخه لكن انا قلتلك السبب الي خلاني او بالاحرى جبرني اسوي جيه

  17. اعتقد اللي يشتري سياره غاليه الثمن بسبب الكماليات
    أما أنا فسيارتي متوسطه الثمن أو كادت تكون رخيصة الثمنن

  18. أنا بنت وبصراحه اوافق وبشده انه الواحد لازم يكشخ بموتر غالي لنه هالايام احترامك فالشارع بالذات بسيارتك

    يعني ابسط مثال اضرب ليت حق واحد لو هندي وانت سيارتك كورولا ولا سني مابيسويلك سالفه ولا بيخوز عنك ​​بس وانت راكب رنج ولا لكزس ولا استيشن يعني مثلي احم احم امره من تدور وراه بيخوز عند بروحه..

    الزمن وتفكير الناس هو الي خلانا نوصل لهالمرحلة للاسف.. بعدين الموتر الغالي اريح تراه في ضرب الخطوط كراسيه مريحه وتقنياته مريحه وجذه يعني طال عمرك

  19. لازم موتر غالي لأن احنا وصلنا لوقت يسمونه مظاهر بمعنئ ثاني مب مهم أنا ارتاح للشئ بس المهم الناس ترتاح له وهذي من أكبر الأخطاء إلي وصلنا لها والسموحة إذا كلامي فيه قصور

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s