100 % مايحسون بتعب المعلمات تلقى الام ضرب رقاد لين الظهر ودوارة العصر ونحن المبتلشات … أنا أرفض هالكلام

صباح الخير …

لكل الموظفين والموظفات وربات البيوت والمتقاعدين

بعض الناس يصرون على النقاش وعلى الملأ مهما حاولت إن اغلق باب النقاش .. وليس تهرباً

غردت لي إحدى المعلمات على تويتر تقول:

“تويتر باب للنقاش ولاتتهرب وأولياء الامور 100 % مايحسون بتعب المعلمات تلقى الام ضرب رقاد لين الظهر ودوارة العصر ونحن المبتلشات”

ومع أنني قلت ما بتكلم في موضوع التعليم … لكن مجبر أخاكم لا بطل

أنا أرفض أولا هذا الأسلوب في الكلام

فهناك من أخواتي ٣ ممن ضحين وتركن التعليم لتربية أبنائهن مع حبهن له ولكنه اختيار

وهناك الكثير من المدرسات والجامعيات والمهندسات وفي كل أبواب العلم من اخترن ذلك

ومب الكل يضرب رقاد لين الظهر .. ومب الكل يسير يدور العصر

أغلب الناس عندهم معسكرات داخلية وحالة استنفار قصوى من يردون عيالهم من المدارس علشان يحلون الواجبات اللي أنتوا تعطونها لعيالهم إضافة إلى الطلبات المستحيله أحيانا!

أتمنى عندما نتكلم إن نبتعد عن التجريح … فهناك على الطرفين ناس نحبهم ونقدرهم … وهناك على الطرفين ناس نحبهم ونتمنى إن نتعاون معهم لتطوير أنفسنا ومجتمعاتنا وبيوتنا وأطفالنا … ومستقبلنا

ملاحظة: تم إغلاق باب المشاركات في هذا الموضوع لأن خلاص ما في فايده … ويكفيني احتواءه إلى مشاركة عاشقة التدريس.

واقدم اعتذاري لكل مدرس أو مدرسة لم يعجبهم كلام الناس وليس كلامي أنا … والسموحه

مع تحيات:
الــــــــوطــــــــن™
@AlWatanUAE
www.alwatan.ae

Advertisements

17 تعليقات على “100 % مايحسون بتعب المعلمات تلقى الام ضرب رقاد لين الظهر ودوارة العصر ونحن المبتلشات … أنا أرفض هالكلام

  1. والله انج تستحقين شكوى على هذا الكلام
    اذا التعليم بالنسبة لج بلشة.. فالبلشة هو انج انتي معلمة
    وابتلش فيج المجتمع قبل الطالبات

  2. حبيت اقول ان مب كل الامهات نفس الشئ في فئه قليله وﻻ تظلمين ربات البيوت إذا من نا حيتي أنا ام لو عندي شغاله بس ما اعتمد عليها في كل شيء والحمد الله على كل شيء تربية العيال في اي شيء يخص عيالي أنا المسؤله حتى ما يعيبهم ان الشغاله تتدخل ﻻنهم تعودوا والطباخ ما يخصها فيه والحمدالله

  3. صباح الخير للوطن آنـّـأ استفزتني هالمعلمه بأسلوبها للأسف اللي يظهر أخلاقها الطيبه أبأ أقولج واتمنى يوصلج هالكلام استريحي عاد مب نحن اللي نرقد للظهر نحن انش أنصلي الفير وانزهب الريوق بأيدنا وانلبس عيالنا بأيدنا وانركبهم الباص بعد آنـّـّّـّّّـّّـّاََ وحده من اللي خليت دراستي عشان عيالي ويكون فعلمج آنـّـّّـّّّـّّـّاََ ما عندي بشكاره أعق عيالي عليها يوم عندي شغل آنـّـّّـّّّـّّـّاََ شغلي ودنئتي عيالي وانا خدامتهم وهياتت العصر ما تحلى بدون عيالي يوم يلعبون فـِ♡ـيْ العزبه و فوق هذا ماحد جبرج تبتلشين بعيالنا يوم أنتي أساسا مب قد التعليم قدمي استقاله أنتي ما أدرسين عيالنا بلاش أظن فـِ♡ـيْ راتب تستلمينه آخر الشهر يعني تدريسج مب صدقه غصبا عنج وشكرا

  4. كلامها مب واقعى أنا ربه بيت ما عندى شى اسمه رقاد لين الظهر وحواطه العصر اصلا مافى وقت للطلعات الإ نهايه الأسبوع ﻻنه ورانا عيال نذاكر لهم وعندى خواتى ثنتين تركو وظايفهم. عشان يربون عيالهم طبعا ما بقول عن اللى يداومن وعندهن عيال أنانيات بس كل وحده عارفه طاقتها وإذا متمسكه بالدوام عشان الراتب حللى المعاش واشتغلى بذمه وظمير
    و دام مبتلشه بالتدريس أيلسى عًنَدِ عيالج استريحى وريحى الناس من زنج غير مأسوف عليج .

  5. انا أعترف عندي عيال لكن اتمردغ لين ما يردون من المدرسه وزين ما يردون لين ثلاث ونص … أتعب من كثر النوم … حتى وزني زايد … أبغي أسير الجم لكن الصبح ما أقدر والعصر بسير المول ويا ربيعاتي ♡ أحلى شي كبتشينو العصر أصحصح شوي

    ويوم أرد الحمدالله الشياطين يقول رقدوا … أحلى راحه بصراحه … وأسهر تلفزيون لين الفجر وأصلي وأرقد … الحمدالله

    عليكم واحد … بس حبيت أغير جو شي … خفو عليها عاد مسكينه ☺☺☺☺

    محبكم … الــــوطـــن™

  6. ياربي أحس من طريقة ردها وباقي الردود انهن مقهورات عادي يعني اطلعن حرتهن ف الطلاب وناقص كل واحد 5 درجات ☺
    ياجماعة أي وحده واثقه من عمرها انها تؤدي رسالتها بمصداقية وبضمير ماراح يستفزها هالموضوع
    بالعكس المفروض يتقبلن النصيحة بصدر رحب المعلمة لازم يكون أسلوبها راقي وتكون فنانه بالرد مثل عاشقة التدريس ماشاء الله عليها
    أتمنى من وزارة التربية تعطيهم دورات مكثفة في فن التعامل يبالهم على هالاسلوب
    والحياة حلوة وماتستاهل حرق اعصاب وكل واحد يشل فقلبه ع الثاني ☺

  7. مدام ال 100 % ما يحسون الاحساس خليناه لمنو ؟!
    انا ضد هالكلام و اذا حاسدينا ع رقاد الظهر استقيلي و رقدي للظهر ههههه
    والله محد يتعب من ورى المدرسه غير الاهل انا كل يوم ناطه لبنتي الا لوحه و الا سبوره ولا لبس رياضه ولا شباصه و اذا نحن ساكنين ف منطقه نائيه شو الترتيب ندق خطوط للمدينه ، شرات ما المدرسه تأدي واجبها و ادرس اجيال نحن بعد نأدي واجبنا و ندرس عيالنا و نتمى انهم يطلعون من الشطار و اصلن هاي فئه قليله من المدرسات جي ترمس.
    و احلى تحيه لكل معلمه ادرس اطفالنا بحب ♡ و ضمير و جزاها الله الجنه

  8. هاي رساله موجهه لكل الناس السلبيه المبتلشات
    لو وسعتي نطاق الدائره اكثر ترى في ناس يالسه تخدم الوطن ويسهرون ليل نهار عسب نحن و انتوا نعيش بأمن و استقرار تناموا و انتوا قريرين العين و غيركم ف الدوام مكروف طول الاسبوع ما يشوف عياله محد اشتكي ولا قال مبتشلين و مبتلشين و محد يحس. الانسان يأدي واجبه بضمير و امانه و لما الواحد يحط راسه عالمخده ترى في عيون ساهره ف خدمتكم احين منو اللي ما يحس

    الحمد لله ع نعمه الامن و الامان

  9. سيكون ردي مختلف عن ردك واكثرا احتراما ؤتقديرا وبالفاظ منتقاه بعناية. وقارني بين أسلوبك أيتها المعلمة ؤباسلوب ربة البيت

    لماذا هذه النظرة الدونية لربة البيت ؟
    إذا كنت جامعية فنحن كذلك وقد نكون أفضل واعلى شهادة منك ولكن. الفرق أننا اخترنا البيت كمهنةا وانت اخترتي التدريس كمحنة

    بالأمس ذهبت لإحضر ابني من المدرسة لأرئ أفواجا من أولياء الأمور يتسابقون للوصول إلى فصول أبنائهم فحتى التي تحسدينها على نومها وضعت المنبه قبل موعد نهاية الدوام المدرسي

    أحيانا عندما يتم الحصار ويحاول المحصور الهرب يبدأ بالتفكير بطرق ملتوية وبكلام غير موزون ويبدأ بسيل الاتهامات ولكن كل هذه الطرق لن تفيد نفعا. لأن البراعم الصغيره اللي امنتم عليها أغلى من أرواحنا وسنبقى نتحدث ونطالب وننصح حتى آخر نفس

    تحياتي ربة بيت جامعية

  10. الي مب في ميدان التدريس مايعرف شو يدور فيه يعني مايحتاي كل حد يتفلسف وقواعد ذهبيه وقواعد فضية مماله داعي اكيد نحن عارفين شغلنا زين مازين يعني مانبا حد يحرض الطلاب ولا اولياء الامور ضدنا بليز..

    • للأسف من ردك مبين انك تحتاج أكثر من مجرد نصيحه … ممكن تشرح لنا اللي مر في الميدان (عسكرية هيه ميدان) ممكن تشرح لنا كيف تربون عيالنا … أتحداك تعترف وتقول الصدق … حلفتك الله تصدقنا … تفضل!

  11. ردج يدل على إسلووبج – اقوول خلي التدريس لان عيالنا ابتلشوا فيج مدرسة و شكلج مغصوبة على الدوام و تطلعين حرتج في ها اليهال وحليلهم
    نحن امهات عاملات – نكد عشان نوفر لعيالنا طلباتكم اللي ما تنتهي و اللي مافيها تقدير لذوي الدخل المحدود – و نرد نجابلهم لحل الواجبات اللي كل مدرس يتحرى مافي غير مادته – حسبي الله و نعم الوكيل

  12. الله المستعان جان أنتي معلمه هاي رمستج الله يحفظ لنا عيالنا ويسخر لهم المعلمات الحنونات …بالنسبه للرقاد اللي حاسدتنأ عليه ترى ما انحصله أيام المدارس وما عندنا اي اعتراض هذا دورنا الطبيعي كامهات ترانا انش ويا عيالنا انلبسهم وانجهزهم للمدرسه ومن يروحون انعابل في الصغاريه اللي عندنا وما غير الطبخ ما أعتقد ان كل الحريم معتمدات ع الخدم ومن ما يردون عيالنا أنتم انذاكرلهم لين المغرب بدون مبالغه وانسبحهم وانعشيهم وانرقدهم واغلب الأمهات اللي اعرفهم هذا هو يومهم المعتاد أيام المدارس مثل ما قلت هذا هو دورنا الطبيعي ف نتمنى انكم تتقبلون دوركم الطبيعي كمعلمات..صج نستغرب ان في معلمات جي اسلوبهم كله استهزاء استقيلوا لو مب راضين بهالمهنه وارقدوأ واشبعوا رقاد شي معلمات غيركم صاروا معلمات حبااا في المهنه الله يسخرهم لعيالنا .

    • ياطويل العمر بس اباك تعرف شيء واحد ان باجي الناس ترجع من دواماتها تتفرغ حق عيالها وبيتها وحياتها الخاصه نحن نرجع بيوتنا قراب العصر ومانقدر نريح لنا ساعه حتى..تبدا عندنا مرحلة التحضير وتجهيز الماده الي بندرسها باجر ومن غير طلبات المدراء والمديرات والموجهين وتقارير مالها اول ولا تالي..مهنة التدريس حبيناها واخترناها بنفسنا بس هاي الايام اتحولت إلى جحيم لايطاق..وظيفتنا هاي معناتها أناها رزقنا يامحترمين ياللي تقولون والله مب عايبنكم فنشو وايلسو فبيوتكم..اكيد مافي حد بيتحمل كل هالمتطلبات والمذله إذا ماكان محتاي الراتب..خافو الله فينا ياناس احنا بشر مب بهايم..

      • نفس الأسطوانه … مع إن سؤالي كان واضح … وبعيده مثل ما تعيدون لطلبتكم الأسئله

        “ممكن تشرح لنا كيف تربون عيالنا … أتحداك تعترف وتقول الصدق … حلفتك الله تصدقنا … تفضل!”

  13. والله بعض المعلمات لموطنات مال كشخه بس ف المدراس اتحس انك داخل عرس هب مدرسه من العبي واللبس والميك أب ،، والبنات بدال ما يركزن ف الشرح إيطالعن هالابله شو لبسه وتبداء التعليقات ،، وف تقطه بعد المعلمه لمواطنه يوم بتسير تطلع رقم فونهاا عسب تتواصل وياهاا لا ريلي ما يرضى أعطي رقمي لحد ،، إنزين يعني الأم وين تفضى كل يوم ف المدرسه عسب أدور عنج عسب تتواصل وياج ،، وف بعض منهن والنعم. هن أيدورن رقم الأم عسب أيكونن دائم ع تواصل وياهاا بس قليل منهن ،، البعض للأسف أيدورن ع الراتب ولان ف بعض العوائل غير مسموح الهاا بشغل غير مدرسه ،،

التعليقات مغلقة.