مرصص ووردي وفولك وخرز وكريستالات على القمصان والكابات وكندوره ملونه تصلق ، والمشكله انهم مب خنوث!

بعضهم يعتقدون أنها الموضه والبعض الآخر يقلد ربعه والبعض يعتقد انه كاشخ مثل صاحبنا لي ساير المول بهاف لكن هم مب خنوث هم مجرد شباب ما أدري إذا يصح نقول صايع … بس أكيد ضايع!!

شعر مصبوغ وهايلايت … وقميص وردي … هيه بس من إد هاردي … وكريستالات على الفنايل … والزلوف والقصات والحواجب والحف … الخ.

لكنهم مب خنوث … يغازلون ويرقمون ويطيحون بعد … هل هيه مشكله … هل هيه ظاهره … شو السالفه !!!

لين نهاية التسعينات حتى الخنيّث كان أريل عنهم إذا ظهر برع جدام الناس … ومحد كان يتجرأ يطلع عند باب بيته جذه … أذكر كان عندي قميص انغسل بالغلط مع شيء حمر واستوى لونه يرد على الوردي ما تجرأت حتى أمش به السياره عن حد يشوفني .. واليوم شو لي صار ؟!

شو في رأيك المشكله ؟
وشو يمكن يكون الحل؟

إذا بتشارك لازم يكون بدون كوبي بيست فكري … يعني ما تكون قاري الكلام في جريده أو سامعنه في الرادو … لازم يكون كلام من عندك !


تعليمات للمشاركة:

◃ أسفل الموضوع هناك مكان مخصص للكتابه
◃ أكتب ما تريد ويصل إلي
◃ خل جوابك مختصر سهل علي وعلى القارئ
◃ حاول لو سمحت تكتب بدون زخرفة الكلمات
◃ بعد المراجعة واذا كانت المشاركة تصلح للنشر اعتمدها فتظهر على نفس الصفحه
◃ الاسم والمعلومات الشخصية كالعنوان البريدي اختيارية

مع تحيات:
الــــــــوطــــــــن™

27 تعليقات على “مرصص ووردي وفولك وخرز وكريستالات على القمصان والكابات وكندوره ملونه تصلق ، والمشكله انهم مب خنوث!

  1. المشكله التقليد الاعمي للغرب أونه يتحسبون عمارهم زقرتيه و عالموضه بلا موضه بلا بطيخ حلاته الريال بكندوره و غترته

    للاسف ماشي حل

  2. المشكله بنظري من اسبابها البيت..لما الاب يهمل المتابعه مع ابنه والانتباه على تفاصيل اللبس وغرس قيم الرجولة فيه..والاعتماد على الام..والامهات بطبيعتهن يحبن الموضة والتقليد..فاتعود ولدها على متابعة الصرعات بدون ماتحس ..وتتهاون ببعض اللبس اللى مايناسبنا واتقول بالبيت بيلبسه..او بالسفر..كذلك ماعاد في احتكاك بالكبار مثل اول ولا بالجيران..تربية مغلقة في مجتمع شبه مغلق ورسمي بين الاهل..وتلقى الاخ والاخت يتقاربون بالاهتمامات نتيجة هالشي..(لاتنسى حال البنات بنفس الوقت وبالذات مع الحجاب اللى صار عاده تناقض التحضر) ..اهمال ابوين في ظل اعلام يربي والنتيجة تساهل شديد من قبلهم لانه يشوفونه تحضر وموضة ماتمس جوهرهم

  3. المشكلة في التربيه و ها كله يعود للأبوين لأن اللي الاحظه و للأسف الشديد أن توجه العائله هالزمن هو تربية الأمور الماديه و ليس تربية الأبناء لدرجة أن الأبوين لا يرون أبنائهم لفترات طويله تحت غطاء دواعي مستلزمات الحياة
    شو فائدة مستلزمات الحياة مع مستقبل ضايع و صايع ، ضعف الوازع الديني و الابتعاد عن صلة الرحم و غيره من هالامور باتت منسية في معظم البيوت ، الله يستر علينا وعلى عيالنا في الدنيا و الآخره و يرحمنا برحمته و اللـه المستعان

  4. أنا في وجه نظري إن البيت وحده ما عاد يربي. يعني ما نلقي اللوم كله على البيت
    المدرسة. تربي. النادي يربي الأصدقاء والصحبه تعلم. أنا إشوف إن الجهود لازم تتظافر حيال هذه الظاهرة الوليده في بلادنا. لازم تتظافر جهود الأجهزة الأمنية. والقنوات الإعلامية والمجتمع كله لنبذ هذه الظاهرة والظواهر الآخرى

  5. السلام عليكم ورحمة الله وبركاته
    زبدة الكلام يوم مايكون ولي على العيال اكيد بيضيعون
    الله يخلي : النت + المجلات + التيلفزيونات + المولات +الاسواق + حتى الشارع
    انته يوم تكون شخصيتك ضعيفه شي اكيد راح تقلد الناس الفاشله من الاماكن الي ذكرتها

    اما بالنسبه للحل هو :
    اهم شي تعود العيال على الصلاة ومجالس الرجال
    وتحاول توصل لهم فكره بعدم تقليد الناس التافهه
    وتذكرهم بأبائهم واجدادهم وتراثهم الاصيل يعني بالعاميه (الشي الي مخلف عليهم )
    الحين والله ماقمنا نميز بين الريال والحرمه والمشكله انهم مب خنوث
    تلقى لحيته كلها صبغ وهو في عز شبابه ولابس عدسات واسوارات وكندورته راصه ومخصره ومطلع نص شعره وكحال وشوية روج (اونه شفايفه حمر)
    ويغازل بنات الناس !!!
    اونه ريال ؟؟؟
    ما اقول غير مقولة جدي (ماتو الريايل يابوعابد)

  6. السلام عليكم
    يعني لو انك تستخدكم ياخوي الفاظ اقل شوي من كلمة خنيث مش يكون افضل على اساس انه موقعك اعلامي بحت وتبا توصل فكرة للجمهور لانه ماقد سمعنا جريدة او تلزيون يقولون خنوث وهاذي مجرد نصيحه وتقبل تحياتي

    • أولا ولو قريت من أنا وموجوده المعلومه هنيه في الكشكول فكنت بتعرف أني مب إعلامي ومالي خص في الإعلام ولا اتبع قوانين الإعلام !

      لكن نرجع لكلمة “خنيث” والذي لم يستحي الرسول صَلَّى اللَّهُ عَلَيْهِ وَسَلَّمَ من قولها … ولم أجد كلمة بديلة عنها !؟

      أخْبَرَنَا إِسْمَاعِيلُ بْنُ مُحَمَّدٍ الصَّفَّارُ ، حَدَّثَنَا أَحْمَدُ بْنُ مَنْصُورٍ ، حَدَّثَنَا عَبْدُ الرَّزَّاقِ ، أَنْبَأَنَا مَعْمَرٌ ، عَنْ يَحْيَى بْنِ أَبِي كَثِيرٍ ، عَنْ عِكْرِمَةَ ، عَنِ ابْنِ عَبَّاسٍ ، أَنَّ النَّبِيَّ صَلَّى اللَّهُ عَلَيْهِ وَسَلَّمَ ، قَالَ : ” أَخْرِجُوا الْمُخَنَّثِينَ مِنْ بُيُوتِكُمْ “ ، فَأَخْرَجَ رَسُولُ اللَّهِ صَلَّى اللَّهُ عَلَيْهِ وَسَلَّمَ مُخَنَّثًا وَأَخْرَجَ عُمَرُ مُخَنَّثًا .

      • وشي كلمه لو دورنا معناها في المعجم ف معناها المراه كثيرة الكﻻم لكن مستحيل ان ننطقها يا اخوي نحن مجتمع اعتدنا ان هالكﻻم عيب ولو ياهل قال مثل هالرمسه نتوتر وانقول من وين اتعلم هالرمسه ف المفروض انراعي مجتمعنا تفكيرنا عاداتنا الله يهديك ويهدينا

      • قال رسول الله صلى الله عليه وسلم :(لعن الله المتشبهين من الرجال بالنساء والمتشبهات من النساء الرجال)

      • هاه

        كوبي بيست فكري … بالقو بعد

        عندما تُسأل سؤال .. يكون جوابك على نفس السؤال .. أما مجرد انك تكتب وتحط أي رد .. ما يستوي .. واللا أنا برد على كل حد بمجرد قول كلمة … “هـــاه”

      • نحن ياخوي. مقصدنا انه مب متعودين على هالكلمة بعدين الموضوع يخص التشبه بالنساء ونقدر انقول عنهم جنس ثالث او مثلا المتشبهين بالنساء وترا الموضوع واضح عنوانه بعدين انت صح مب اعلامي او لا تتقيد بقوانين الاعلام. بس انت تعتبر محطة اعلامية لانك تبث لكثير من الناس الاخبار وفاتح باب الحوار والنقاش وتطرح قضايا حلوه وتخص المواطن والوطن عسب جذيه اتمنى انك ماتفهم كلامنا على انه انتقاد شخصي ولكن مجرد تعليق على كلمة ماتعودنا نسمعها او نشوفها في مجتمعنا من خلال النقاشات الجادة والاماكن الثقافية . وتقبل تحياتي

    • عفوا لو تسمح لي الوطن عندي مداخلة بسيطة بشأن الكلمة
      الكلمة وردت في الحديث الصحيح ووضح الرسول عليه الصلاة والسلام معناها وتشمل المتشبهين من الرجال بالنساء
      وللي معترض على الكلمة فالأولى أن نعلّم الطفل معناها ونوضح له ان العيب فيها إن تصرفات الشخص اللي تطلق عليه هذي الكلمة محرمة وتنافي الرجولة وماينبغي أن يكون عليه الرجل من صفات وشكل
      وأن يتعلم الطفل أن التلفظ بهالكلمة [ كمسبة] لأي شخص يعتبر قذف ويعاقب عليه الشرع والقانون
      العيب في اللي يسوي اللي يسويه هذا المنحرف وليس في الكلمة بحد ذاتها
      خالص احترامي والسموحة من الجميع

  7. نحن نعيش في عالم الاستايلات، فصار احساس النشء بقيمته من خلال تقييم العالم لأناقته ونظرته لشكله
    والشاب بحاجة لإثبات ذاته ووجوده ووجد ضالته في الإعلام اللي وضع هذا التقييم وعززه في النفوس ورسم للأناقة نموذج يحتذي فيه الشباب

    [ الطفل يخضع لرقابة الأم وتحت مسؤوليتها حتى سنوات طفولته الأولى ]
    ومع السبات اللي تنعم فيه الأم
    وغياب الرجولة القدوة والمثل.. انعدم الفرق عند الشباب في كلمة الجوهر والمظهر

    المصيبة صرنا نعتاد على وجود هالأشكال ومن اعتاد على شي هان عليه يعني مع الوقت مابتفرق عند الأغلبية

    والحل.. تظافر جهود كل الأطراف ذات المسؤولية بالإهتمام بهذي الفئة وتوعيتهم والأخذ بهم الى الطريق الصحيح..
    والأهم.. ان أصحاب الشأن يعوون إلى أن التربية ماعادت سهلة مثل أول ويدركون حجم الأمانة اللي ائتمنهم الله سبحانه عليها

  8. حريه شخصيه خلهم يمنعون اللبس من المحلات ولا. المولات عشان محد يلبس جذيه

  9. صدق اخونا الوطن .. أشكااال عافانا الّلـہْ مقززة وتعافها النفس البشرية ‏​ﺂلَلِيۓ بعدها عالفطرة وما اظن هالشيء له علاقة بالدين لأنه حتى الأجانب ‏​ﺂلَلِيۓ يقلدونهم ما يرضون لعيالهم يكونون (مخـ…..)
    بس منو يفهم ؟!
    اللحين حتى البنااات يموتون ؏ﻟى استايل هالشباب لدرجة حتى سياييرهم يضربونها بصبغ وردي كل هذا للفت الأنظار لا أكثر..

    صح الشكل الخارجي مهم ويعطيك انطباع 70 % بس تعال ناقشه واللـْ♡̨̐ـِْه تقوم عنه ولسان حالك يقول حسبي الّلـہْ ونعم الوكيل
    فاعتقادي انعدام الثقة بالنفس والخواء الداخلي هي ما يعانيه هالشباب وتخليهم يلجأون لهالتقليعات و ذلك اعتقادا منهم انهم عالموضة وكشيخة !!!
    امحقق كشخة (˘˘̯)

  10. بالنسبه لي اعتقد ان غياب الاب له دور اساسي في المشكله … الاول كان الولد يروح ويا ابوه ويخالط مجالس الرياييل وكبار السن ويعاون ابوه في كل شيء الحين الاباء بحجه توفير الماده مب فاضيين للعيال حتى صلاه الجمعه ما بيشلوهم معاهم أنا ما انكر ان في حريم تربيتهن احسن عن الرياييل بس قله قليله وفي زمنا هذا… نادرات

  11. اتعرف انت انسان ماتناقش مادري حق شو مسوي موقع ونقاشات ويابوي نحن رياييل قبل لاترمس ولا تقول ومب نحن اللي اتي اتقول حضرتك مارضينا على كلمتك والرسول اعز عنك وعني يوم اتسير عند عيالك وهلك واتقولهم خنوث ومادري شو وقتها تعال ارمس يالله نحن مانعرفها هاي الكلمة في بيوتنا ويوم قلنالك من باب النصيحه اما انك تغلط ماسمحلك لا انت ولا غيرك

      • مسوى نفسك فيلسوف زمانك ولا المنصوري صادق مدري ليس مسوى هذا الموقع ولا شكلك انت وموقعك ماعندك سالفه

      • ممكن لو سمحت تشاركنا بشيء مفيد .. ولا تضيع وقتي ووقت القراء بهذه التفاهات .. ممكن أني ما أعرض هذا الكلام الفاضي .. لكن بس علشان يعرفون الناس شو استلم يوميا من أمثالك

        عموما لو لاحظت أنا ما قلت شيء ولا تفلسفت في الموضوع .. الكلام للناس الطيبه المحترمه اللي تقدم رأيها وتتناقش حتى ل اختلفوا يضل احترام الحوار موجود

        عموما ضاع الموضوع ومحد ركز على كلامي .. التركيز كان فقط على كلمة خنيث أو خنوث .. وياليت لو حد انتبه أني قلت .. انهم “مب خنوث” … فشو لي يدفع شباب مب خنوث انهم يلبسون ويتمشون ويتكلمون ويقصون شعرهم مثل الخنوث … هذا كان محور النقاش … لكن للأسف ضاع … والسبب أمثالك … الله يسامحك

  12. تطورنا
    لِدرجـة أن آلفتاه أصبحت بويـہ
    وأن الشـآب له اهتمامات أنثويه
    والكل من حولهم يعلمون وصامتون
    وكأنهم يوافقون على فحش ما يصنعون
    ولا يهمهم سخط الله وغضبه ..

    هذا الكلام عجبني و تراه كوبي بيست فكري و منقول بس حبيته و نقلته و السطر الثاني هو محور الحديث

  13. السلام عليكم. ياخي أنا استغرب من الي يقول المشكله في الأهل او ماعرفو يربونه ياخي هذا كلام فاضي إذا شخص عمره 18 سنه وفوق كيف الأهل بيربونه أنا اشوف المشكله قلة الدين الأهل مايخصهم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s