هل لازم البنت تعرف تدبير أمور البيت كالطبخ والأشياء الثانية … مثل حريم قبل!؟ واللا حريم اليوم “حرمه بقشه” !؟

أغلب بنات اليوم ، وأكيد محد يقول الكل لكن 99.999% يعني ما يعرفون يقلون بيضة ولا يسوون كوب شاي!

ولولا ميري وسرتاج لماتن وماتوا الرياييل وياهم ، أنا ما بطول عليكم لأني أبغي أسمع كلامكم

” حرمه بقشه “ كلمه كان الوالد يقولها يصف فيها حريم اليوم اللي ياخذونن للزينه فقط والدواره … مثل البقشة لي تدور من بيت لبيت !

110

عموما في المقابل فيه ناس تقول لو كنا مثل حريم الأمس لي همهم الطبيخ ومجابلة البيت والعيال .. وما تعدلنا وتزجرتنا .. كان صدق شردوا الرياييل وما قروا .. الحين كل هالزينة وبعد الرياييل مالهم أمان لو لقاها ريحتها بصل أظن خلاص .. كل يوم مطيح هناك في قهاوي راس الخيمة !؟

أترك المجال لكم … وخلوكم كوول .. بدون جرح وتجريح


تعليمات للمشاركة:

◃ أسفل الموضوع هناك مكان مخصص للكتابه
◃ أكتب ما تريد ويصل إلي
◃ لازم تكون المشاركة من كتابتك وليست نقلا
◃ خل جوابك مختصر أقل من ٥ أسطر فقط سهل علي وعلى القارئ
◃ حاول لو سمحت تكتب بدون زخرفة الكلمات
◃ بعد المراجعة واذا كانت المشاركة تصلح للنشر سوف اعتمدها فتظهر على نفس الصفحه
◃ الاسم والمعلومات الشخصية كالعنوان البريدي اختيارية

مع تحيات:

الــــــــوطــــــــن™
اتبعني Follow @AlWatanUAE
www.alwatan.ae

Advertisements

30 تعليقات على “هل لازم البنت تعرف تدبير أمور البيت كالطبخ والأشياء الثانية … مثل حريم قبل!؟ واللا حريم اليوم “حرمه بقشه” !؟

  1. بصراحه ومن وجهة نظري…حريم اليوم ع قولتك بقشه بس يتناسبون ويا شباب هاليومين ….لأن الشباب الحين لايهشون ولاينشون. رجوله بس الاسم ومب قـد المسؤوليه….يعني كلهم يناسبون بعض

  2. حتى الرجال أتعيرو مب بس الحرمات
    الحرمه المجتمع كبر رأسها قبل كل همها بيتها و عيالها
    الحين البيت إديره خدامة والطبخ على الطباخ
    والحين تريد اتسوق اتقولك بنت فلان أحسن مني عندها لبسن و سياره ألمانيا آخر موديل

    مجتمع 😦

  3. باختصار ، الكلمه المطلوبه هي. (( الأساسيات )). ، بالنسبة للحرمة مب لازم تعرف كل شيء لكن أقل شيء تعرف تطبخ شيء بسيط حق ريلها مب لازم مكبوس وبرياني وكل شيء ، انها تتعدل حق ريلها بعد نفس الشي ، أهم شيء تتعدل ولو شيء بسيط مب لازم تكون عروس كل يوم وتقعد بالساعات قدام المنظرة ،.والريال نفس الشي لازم يعرف أساسيات الحياة الزوجيه وبعدين يعرس والحرمه لازم تتعلم الأساسيات و بعدين تروح مع ريلها ؤهالشي يباله تعليم من الصغر مب قبل العرس بس .

  4. نعم اختربن. همهن الدواره والعزايم. ويشوفن غيرهن دقه جديمه. لكن شُـو الفايده. مــن الكلام دام الرياييل عايبنهم الحال. هيه ماتنلام (خلقت مــن ضلع أعوج) لكن هو ربان السفينه

  5. الوطن لازم تعلق للردود
    وإلا ألنقاش بنتهي
    انت المحرك الأساسي للنقاش عسب يستمر

  6. جوف كل واحد يحط ع المجتمع و مثل بعض و مادري شو! اخوي العزيز الوطن ترى نسبتك غلط ، يمكن لأن العيوب هي اللي تجوفنها بارزة أكثر من مزايا الحريم. بس ترى نحن شراتكم يالرياييل ؤالله، مثل ما إنتوا فيكم الزين و الشين و مب كاملين نحن بعد مب كاملين .. الفرق هو مدى تقبلكم للشي.
    هالموضوع ذكرني بعبارة قريتها ف رواية لكاتب إماراتي، قال أن الريال يبالغ بنظرته الملائكية للمرأة و يطلعها من تكوينها البشري *الناقص* عند أول زلة و سيدة تصير هي و هي و هي كلها سلبيات.
    ردي باختصار :
    صحيح الزمن تغير و أسلوب الحياة بس ترى البنت لو ما تتطبخ ما يعني أنها مب زينه كحرمة ، بتتعلم ف بيت ريلها دامه يباها تتطبخ بس يحتاج شويه صبر. و ترى حتى حريم أول مب كاملات بس رياييل أول يتغاضون و يتقبلون الحرمة بعيوبها لأنهم عارفين عدل إن كل طرف لازم يتنازل شوي علشان الحياة تمشي و حبة حبة الواحد يتغير و يصير أحسن

      • متقبلين دعابتك اخوي الوطن بس بعد مب قريبة من الواقع خخخخخخخ
        أقول هالشي على أساس إني بنت و البيئة اللي حواليني أو اختلاطي كله فيهم .. و أرق تحية لك اخوي على فتح باب النقاش بهالموضوع ^^

      • حتى أنا أتكلم من واقع … واللي أشوفه بنات اليوم غير الكيك ما يخصهم … صح الكيك حلو … لكن محد بيعيش عالحلو طول عمره

        أنا أقول هالكلام من واقع المجتمع … صح يمكن مب 99.999 لكن خلنا نقول 95% ما يعرفون كيف يسوون صالونة دياي !

  7. أول شيء هل يستاهل الرجل إن المرأة تطبخ له!!
    المرأة. وظيفتها إنها تصون الرجل و تخدمه و على الرجل أن يصونها و يحترمها و يساعدها ف نفس الوقت لكن إسمحلي أخوي الرجال ف هالزمن ما يستاهل إن المرأة تطبخ له و لا حتى تسوي له شيء و الشي بالشي يذكر

  8. النقاش حلو وممتع
    أتمنى انه يستمر ونوصل لحل سلمي يرضي الطرفين

    على فكرة أنا ما تهجمت !

    احترم الآراء والنقاشات،،

  9. السلام عليكم .. فالبداية حبيت اوضح انه النسبة هي مجرد رقم افترضه الكاتب للتشبيه ولا اساس له من الصحة .. وكتعليق مني حبيت اقول انه حياة البنت اليوم غير واصعب عن حياة حريم اول.. وهالشي شباب اليوم. مب فاهمينه .. وبالفترة الاخيرة صارن البنات واعيات ومدركات لاهمية التدبير المنزلي ومهاراته بالاضافة للكشخة والزينة والتوفيق بين الحياة الاسرية والحياة الاجتماعية وكذلك العملية واحيانا العلمية ..

  10. حريم اليوم ….. حريم أمس
    في فررررررق بين حريم اليوم وحريم أمس ..
    وفي فرق بين ريائل اليوم وريائل أمس …

    لو الواحد بيقارن بين الاثنين بيلقى. في اختلاف وفرق بينهم .. ومب كل البنات ما يقدرون يديروون أموور البيت. وبنفس الشي ريائل اليوم مب كلهم يقدر الواحد يعتمد عليهم. جيل عن جيل يفرق لاتقارن بنات اليوم بحريم أمس … قارن بنات اليوم بحريم اليوم. وشوف

  11. الموضوع جميل و النقاش حامي أول شيء بعلق على بنات الجيل هذا:
    بالنسبة لهن لي تطبخ خدامة، هذا الي شافنه و هن يكبرن في بيوتهن خدامات و طبابيخ، و ثاني شيء الحرمة تقدر توازي بين تجملها لزوجها و بين تأدية واجبها في البيت.
    يقولن الرجال تغيروا في هذا الوقت، و قد لا يكون المثل القديم الطريق إلى قلب الرجل معدته دقيق، و لكن لو الحرمه إذا عطت الرجل حقه، هو بيعطيها حقها مرتين، و هذا اﻹسلوب الي كانن يتبعنه الحريم اﻷوليات الناجحات مع رجالهن.
    و النصيحة الثانية عليكم باﻷساليب السحرية الي دوم يخبركم عنها الوطن

    • هيه يا بو علي … أنا أخبرهم لكن ما شي فايده … هن ما ذابحنهن غير سحر هذيلاك لي يشتغلن في قهاوي راك وطلعن بريئات … يبون من الغرشه ما المبيّض ويقولون بيستوون هم والخير مع أزواجهم رباعه ☺

  12. من خلال سوالفي ويا ربيعاتي ، دايما أسألهن هدا السؤال ،
    قبل الزواج تعرفون تطبخون، أو بالأصح تعرفن المطبخ وين ؟
    أعليتهن جوابهن لأ
    بس بعد الزواج البنت غضبن عليها تتعلم الطبخ والنفخ ، يعني كانوا يقولولي مع الأيام صرنا نتعلم ، وصارن ما شاء الله عليهن ماهرات في الطبخ ،
    يعني بالأختصار اللي تبي تحافظ على بيتها وعيالها وزوجها لازم الحرمة تلبي رغباتهم
    وتوفر لهم الراحة ومتطلباتهم، الزواج حياة يديدة بكل النواحي

  13. البنت لازم تعرف أساسيات الطبخ.. بس من وجهة نظري حياة المرأة الآن أصعب لأن قبل الأكلات كانت محددة بس الحين الريال ما يعجبه أي شيء مرة يبا لبناني ومرة هندي ومرة مكسيكي والحلو صار شيء مهم بعد أي وجبة.

  14. الممشكله بالبيت لان التربيه تكون بالصغر
    يعني إذا اهالينا ما علمونا الطباخ من الصغر وش ذنبنا إذا كبرنا وعرسنا وما نعرف
    زين لو وحده تعرف تسوي شاي وكيك وبيض احسه كافي مب لازم صالونه دياي مرة وحده
    وليش الريال ما يتعلم الطباخ ويساعد مرته
    والله مافيها شيء بالعكس

  15. ربيعتي بتسافر الاسبوع الياي اوروبا مع صديقاتها وبتترك بنتين الاولى عمرها سنه والثانيه سنتين مع أبوهم والخدامه فـي البيت عفوا ويـن الرياييل ويـن كنا؟ وين صرنا؟
    همها عبايتها وسيارتها ووظيفتها القضيه مب قضية طبيخ البيوت ضاعت للاسف واختلت الموازين

  16. ألطريق لقلب الرجل معدته
    مااختلفنا ومازالوا البعض يحرص على تعليم بناتهم قبل الزواج فى أمور الطبخ
    وأنا من وجهه نظري زياده على أمور الطبخ ويمكن الأهم هو توعيه البنت بأمور الزواج سواء من المعامله مع الزوج وكيف يمكن مواجهه مصاعب الحياه الزوجيه لأنها فيها من الصعوبات آلتى تحتاج ألى تنازل وصبر من الطرفين لأنها أيضا سوف تتعامل مع أهل الزوج .ولأن الزوج إذا. رأى من زوجته من التصرفات سواء الزوجيه أو الخارجيه ألى تخليه يحبها وصار فيه تفاهم بيصير فيه من الود ألى بيوصلها لقلبه .وبالتالي هو من بيصبر وبيعلمها الأمور ألى يحبها
    فهى إذا حست باحتواء زوجها لها بتجاهد حتى تتعلم كل مايحبه زوجها من طبخ وغيره

  17. كلمة اعتذار لأخوي الوطن .
    أنا استعجلت بالحكم يوم قلت البارحة“ الوطن ! على فكرة واايد حاط عل الحريم.“
    لكن بالحقيقة مواضيعك ونقاشاتك أغلبها بنصرة وحل مشكلات الحريم ،
    مواضيعك هادفة و مشكلات اللي تطرحها معاصرة وواقعيه ،
    وأنت انسان واقعي ، تنظر للأمور بواقعيه وشفافيه

  18. والله.أنا بتكلم عن نفسي. من مواليد 78مربيه بناتي. تربيه سنعه ما بمدح وايد بس كلمه مختصره ربت بيت مثلي تماما طبخ كل شيء وتنظيف وغسيل وكل الي كنت اسوي أنا مع وجود الخدامه لكن دور كل بنت موجود وخاصه إذا عندي ناس

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s