كيف تجهّز أطفالك للمدارس وتخليهم مستعدين لعام دراسي جديد .. علشان يبدون الدراسة بشكل طبيعي وبدون مشاكل

bigstock_bored_daydreaming_student_16442633a

أتمنى لكم ولعيالكم عام دراسي جديد مفعم بالحيوية والنشاط والتحصيل العلمي .. وان شاء كلهم يطلعون “الأولى”

أليكم بعض النصايح المفيدة اللي المفروض الكل يسويها ليضمن بداية طيبة للعام الجديد:

  • من باجر خلوهم ينشون من وقت تدريجياً حتى ما تتأزمون أول يوم
  • حاولوا تفحصون نظر عيالكم لأن الكثير من اليهال عندهم مشاكل نظر لكن ما يدرون
  • خلوهم يجلسون على كرسي في البيت مدة ساعة كاملة بدون حركة أو صوت
  • خلوهم يشربون كوبين ماي بارد وبعدها امنعوهم من الحمام لين ما يخرسون ثيابهم
  • صرخوا عليهم وقوموا بضرب الطاولة بالعصا مثلاً لاصدار صوت مخيف
  • بعد أن يجلسوا على الكرسي لمدة أربعين دقيقة أشربوا كوب ماي بارد أمامهم وأذا قالوا يبون ماي صرخوا عليهم
  • بعد أن يجلسوا لمدة ساعة بدون أيباد أو تلفزيون طبعاً عطوهم عشر دقايق يسيرون الحمام ويشربون وياكلون
  • وهم يالسين عطوهم ورقة وقلم وخلوهم ينسخون صفحة كاملة من أي كتاب وبسرعه لين ايدينهم تعن
  • أذا حد منهم خلص النسخ وما أشتكى من تعب صبوعه .. عطوه زياده .. هذا مستقبله لازم يتعب
  • ما يضر بعد تكررون عليهم بعض الكلمات المستخدمة في المدارس مثل غبي أو ما تفهمين أو اولاد الكلب علشان ما ينصدمون في المدرسه
  • وطبعاً بين الفتره والثانيه كفخه على الأيد باستخدام قلم فولوماستر أو مسطره علشان يتعودون وما يردون يصيحون من المدرسه
  • وأهم شي الدّح .. أبدوا بدح خفيف وشوي شوي زيدوا القوة لين ما يتعود الولد أو البنت على دحه قويه بدون لا ينقطع نصخه .. لأن أنقطاع النصخ والله مب زين على اليهال
  • أذا عندكم ولد كبير فالبيت زين وإذا لا ممكن تستعينون بحمّود ولد عمتهم يضربهم شوي علشان يتعودون على جو المدرسة خصوصاً في الفسحة
  • أكيد خلصتوا من شراء شنط المدارس .. حطوا لهم أي شي ثقيل فيهن وخلوهم يشلون الشنطه على ظهورهم واللي عنده بيت دورين خلوهم يطلعون وينزلون كم مره لين يتعودون
  • حطوهم في غرفة وسكروا عليهم المكيف وخلوهم ما يتحركون ولا يتكلمون واذا اشتكوا صرخوا عليهم .. محد يعلم يمكن صف عيالكم من الـ 20% اللي بعدهم ما سوو لهم صيانة
  • بعد صلا ة الظهر خلوهم يشلون الشنطة الثقيلة ويوقفون في الشمس عشر دقايق علشان يتعودون شوي شوي على الحر

أتمنى اني ما نسيت شي مهم واللي يحس اني طوفت شي مهم يخبرنا .. كله ولا عيالنا .. جيل المستقبل الواعد

مع تحيات:

الــــــــوطــــــــن™
اتبعني Follow @AlWatanUAE
www.alwatan.ae

Advertisements
بواسطة الــــــوطــــــن™ نشرت في غير مصنفه

8 تعليقات على “كيف تجهّز أطفالك للمدارس وتخليهم مستعدين لعام دراسي جديد .. علشان يبدون الدراسة بشكل طبيعي وبدون مشاكل

  1. استإنست من عنوان الموضوع وكنت أتوقع شيء زين والله احتاج نصايح بنتي عمرها 3 سنوات و 3 شهور وسجلتها. ويا عيال خالتها بس وااااايد متعلقه فيني فبشو تنصحني عشان يعدي اليوم بدون صياح طبعا أنا يوميا أقولها أنج بتسيرين المدرسه وخالتج بتوديج

    • صدقيني فكري فيها استخدمي نفس النصائح علشان تعودين بنتك على جو المدرسه يعني خليها تيلس على كرسي وعطيها قلم وورقه وخليها تشخبط عوديها من الحين تقول متى تبغي الحمام وإن شاء بتهون المسأله عليها ومهما كان فأول يوم أو حتى شهر بيكون صعب عليها وعليك بعد لكن أهم شيء انها ترقد مرتاحه وتشبع رقاد لأنها إذا سارت وهي نودانه بتصيح اللا إذا أنت مودتنها مكان فيه أوادم ويسمحون لليهال يرقدون إذا ياهم رقاد وما يضر تمرين عليهم المدرسه تشوفين المدرسات والموظفين والحمامات وتأخذين بنتك وياك الاسبوع هذا قبل المدارس تراوينها بنتك قصدي المدرسه وإن شاء الله بترتاح شوي للمدرسه

  2. والله نصايح من ذهب ﻻنه هذا واقع مدارسنا كرف وتعب واهانات واخر شى يدخلون الجامعه كل اللى تعلموه ماله علاقه بالتعليم الجامعى بس تحطيم نفسى وارهاق بدنى يعنى عودو عيالكم من الحين الاجواء السلبيه وﻻ احد يتفلسف ويقول انت وين عايش احنا عايشين الواقع الممل بالمدارس

  3. انت ياخ يامريض نفسي يامريض نفسي الطفل لما يعامل بهذا الشكل راح يجيه نفور من الدراسه والمدرسة عموما اضرب بدون سبب ليه بروح الطفل لمعتقل انت عمرك مااطلعت على أي موضوع من مواضيع علم النفس ولا ماكان هذا كلامك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s