بيض و طماط .. لا لا هذا ليس موضوع عن وصفة طبخ .. ولكنه عن الرنج واللكزس

17352012113557Beidh wa Tomat

“لا حبيبتي البيض وايد غالي .. باخذ شدّه صغيرة مؤقت لين ما يرخص البيض”
 بصراحة لما سمعت هذا الشاب اللي ما بلغ الثلاثين من عمره يقول هالكلام وهو يكلم زوجته على التلفون وواقف أمام ركن البيض في الجمعية خفت لأنه أنا بعد ناوي أشتري شدة بيض .. ومشيت بخطوات حذرة جداً جهة البيض .. وأبتسمت .. لأني الحمدلله أقدر أشتري بيض وما راح يؤثر وايد على دفعات أقساط السيارة .. لأن سعر البيض طلع مرتفع درهم واحد فقط .. الحمدلله يعني راح أفطر بيض في الصباح كالعادة بإذن الله

egg-carton

أستغرب من بعض الناس يستغلي درهم زيادة في بيض وممكن ما يفطر بيض الصبح لا هو ولا أهل بيته ولكن عادي عنده يشتري سيارة قيمتها 700,000 بيضه .. طبعا بنفس مبلغ السيارة يقدر يستهلك عشر بيضات يوميا لمدة 200 سنة .. وطبعاً هذا الموضوع محيرني من سنوات وفكرت فيه كثير ولكني لم أجد له سبب مقنع .. فلماذا يا ترى يصرف الخليجي مبلغ خرافي من المال على سيارته ويستغلي على نفسه بعض الأكل لو أرتفع سعره شي لا يذكر؟!

37370FE_DA_RottenTomato_012213

وطبعاً ليس فقط البيض .. خذ الطماطم مثلاً أو الطماط كما نسميه في الإمارات .. تجد الناس تمضي ربع ساعه تنقّي الطماط لتنتقي الصالح منه .. مع أنه بإمكانهم شراء وما بقول الطماط الهولندي الغالي نسبياً ولكن الطماط الماليزي الذي يزيد سعره بمجرد درهم أو درهمين بالكثير أحياناً ولكنه أجود من الطماطم العادية بعشرات المرات

new_truss_tomatoes

وحتى الطماطم الهولندية .. مالذي يمنع المواطن الخليجي من شرائها للسلطه مثلاً .. فالكيلو عادة ب 18 درهم .. أووف غالي .. لكن عادي عنده يطلب في مطعم سلطه بـ 40 درهم تحتوي على نصف طماطاه هولنديه وورقتين خس مستورد .. سر عجيب وغريب .. الفلوس نفسها والشخص نفسه والمعده نفسها .. لكن عندما يأكل في مطعم فهو يأكل لسبب آخر غير الأكل طبعاً .. أحياناً يكون السبب أنستجرام وأحياناً سناب شات .. وأحياناً عن يقولون عنه الناس بخيل !!

ويبقى طبعاً أعظم شي عجيب لا يمكن تفسيره ولو أجتمعوا علماء أمريكا واليابان وألمانيا وهو .. الكرك

11975174153_339c78e714_z

لا لا ما أقصد حب الناس الغريب للكرك .. وللأمانة أنا ما أشرب ولا أستسيغ الكرك ولكن الناس أذواق فعليكم بالعافية .. ولكن الشي اللي حيّر العقلاء هو كيف أن المواطن يوقف عند محل الكرك في موتره اللي قيمة رقمه تضاهي قيمة السيارة نفسها أحياناً ويطلب شاي كرك ويمكن خبزة باراتا .. ويا ويله بابوه لو غلط  ورجّع له درهم واحد بدل الدرهمين اللي المفروض يرجعهم .. عادي توصل لمخفر الشرطة .. وطبعاً من المستحيل يقول له خل الدرهمين حقّك .. لكن نفس المواطن يروح كوفي شوب ويحط السويج (مفتاح السيارة) على الطاوله ويعزم ربعه ويفر نوط بو ميتين (200 درهم) ويقول للفلبينية خلي الباقي !!

غداً صباحاً راح ألوّح بسندويشات البيض ، لأني أفطر وأشرب قهوتي في الدرب للعمل ، عندي أكثر من ساعة أستفيد منها في الأكل دام استخدام الموبايل ممنوع .. المهم راح ألوّح بسندويشات البيض لكل واحد راكب رنج ولكزس في الشارع هههههههههههه

مع تحياتي

عــبداللـه @ الــــوطــــن™

 

Advertisements

5 تعليقات على “بيض و طماط .. لا لا هذا ليس موضوع عن وصفة طبخ .. ولكنه عن الرنج واللكزس

  1. عن نفسي اول ما اشتغلت خذيت كامري اللي كانت تناسب راتبي وللحين عندي .. والحين اسمع الاهل و الاصدقاء يقولون لي متى بتاخذين سيارة بديدة .. ما مليتي من سيارة الفقارى .. للاسف هذا تفكيرهم .. انا الحمدلله اقدر النعمة و اعرف قيمة الخمس دراهم يم اشتري منها ريوقي الصبح .. او العشر دراهم اللي اصرفها ع اكلي خارج البيت .. طبعا مب بخل ع نفسي .. بامكاني اشتري وجبه ماك بعشرين لنفسي وللي معي .. بس انت محاسب عند رب العالمين ع الاسراف .. طبعا ما يضر مرة او مرتين بالشهر .. واحيانا اكافئ نفسي .. اعتقد سبب فعل الناس هو المظاهر وعسب مايقولون عنك بخيل .. وانا يم اشوف هالشي بالشارع اعرف ان هالشخص غارق بالديون .. بالنسبة لي اعيش طول عمري ع الكامري مالي و اتريق موزة من البيت و كوفي من الدكان واسمع كلام الناس الفاضي واسوي طاف ابرك لي عن اغرق بالديون واشتري كرواسون بو عشرين من الكوفيهات

  2. أخوي الوطن. نورت خدمة الوطن. والله زمان فترة طويلة جدا ونحن ننتظر الوطن ينزل موضوع واقعي وكلام بسيط لا يوجد فيه تصنع.

    أتمنى أخوي الوطن ترجع من جديد.

    موضوعك جدا رائع. كلامك كفى ووفى. هل من معتبر ؟!

  3. صدقت هيه والله لكن كيف بتفهم عقول تفكيرها محدود فقط في امور البهرجه والتفاشر فهذا داء العصر في بلادنا للاسف هذه ظريبة التطور الرفاهية الزايده

  4. سبحان الله حسيتك تتكلم عن وحده اعرفها يوم ذكرت موضوع الطماط والبيض… كل مره اسير وياها وانصحها تشتري العضوي لانه هو الفوايد كلها تقول وااايد غالي وتشتري العادي معنه الماديات ما شاء الله وفوق هذا كله انا اشتري جدامها بفلوسي كتشجيع معني طالبه وبمصروفي لكن الموت ولا تشتري لانه بعيونها غالي! ويوم سرنا نشتري البيض نفس الحاله بس لانه العضوي اغلى لو قلتلك الفرق بتضحك… بخمس دراهم بالقليل وبالكثير بعشر او 15؟؟؟؟!!! احس انه الصحه المفروض ماينبخل عليها وربي يحب يشوف نعمه على العبد .. وعادي تضيع ميات على اشياء تافهه.. =\

    الناس اولوياتها غلط للاسف… بخصوص السياره ترى راضي انه يدفع دم قلبه ولا انه يحس بالنقص ( في ناس مب واثقه بنفسها اللي عرفها دكتور طارق الحبيب “الرضا”. وسبحان الله ربك يبارك للراضي ويزيده. وقبل كل شي يوصل لحالة الطمأنينة وماحلاها من حالة.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s