شو هوه مفهوم التعري بالنسبه لك !؟
صبر صبر ما قلت فكر بعدين بخليك تفكر الحين لو سمحت كمل قراءه … أكيد تقول شو هالسالفه بعد … وفي نهاية الكلام بتنصدم … بس اتمنى بعد الصدمة تفكر مع اللي عدالك مب معاي أنا … لأني غير الكلام لي كتبته ما عندي زياده !
المهم كثيرا ما نسمع عن قانون الاحتشام والمواطنين خصوصا يطالبون بقانون ضد التعري … قانون للاحتشام … لكن شو مفهوم الاحتشام … أصبر مب الحين التفكير … حد بيقول ما يلبسون قصير … لين وين قصير؟ … تحت الركب فوق الركب … أنزين إذا فستان طويل وفيه طر لين فوق … هذا محتشَم وإلا لا ! جينز طويل بس مرصص !
شو هو مفهوم الاحتشام … ما أراه أنا محتشما أمي بتشوفه فاضح لأن الموضوع مب واضح !
والحين المعضلة … جاهزين … من أكثر احتشاماً … أجنبيه لابسه تنورة تحت الركب وكراعينها طالعه وفوقها قميص كُم قصير وطبعاً الشعر كشف … وإلا … مواطنه لابسه عباه وسيعه ”باتمان“ ومفتوحه ولابسه تحتها سترتش أو سكيني و و و و نص الشعر طالع والكعب تقول ”نيزه نغاره“ أي وحده محتشمه أكثر !!!
قبل سنوات ناقشت الموضوع مع أخي المفكر الكبير طارق وما قدرنا نوصل لجواب … وفي نفس الوقت كان هناك داعيه مشهور يتكلم عن موضوع الاحتشام وانه يجب أن يفعَّل … وسالناه السؤال التالي :” كيف كان لبس الكفار الذين كانوا يعيشون بين المسلمين في الدول العربيه على مر مئات السنين“ …. والجواب كان … التهرب … نعم تهرب من السؤال ولم يجب !
المهم علشان نقدر نطبق قانون احتشام قابل للتطبيق … لازم نحط قانون منطقي … أو نقول إن الجميع ما يطَلْعن إلا الوجه والكفين !
الكثير منكم مب الأجانب بيكونون أول المعارضين لهذا القانون !
رأي الــوطــن™: نسوي لجنة من رجال الدين والمفكرين ليناقشوا إمكانية الخروج بصيغة مرضية وقابلة للتطبيق لقانون احتشام معقول يرضي جميع اطراف المجتمع !
الحين يله ممكن تبدون التفكير !!
مع تحيات:
الــــــــوطــــــــن™
اتبعني Follow @AlWatanUAE
www.alwatan.ae
الـكـشـكـول 
من شبه المستحيل وضع قانون منع الاحتشام في بعض المدن
مثلاً في مدينة دبي من إشهر مدن العالم حالياُ والزوار من كل مدن العالم من غير المقيمين وهذيلا أغلبههم مب مسلمين…
قانون الاحتشام بيضر المدينه ف كل النواحي السيحاحيه والاقتصاديه…الخ
وبعدين في مسلمين ف كل انحاء العالم وأغلبهم مب محتشمين يمشون مفصخين ف الشوارع..
وين راح غض البصر!!!!!
وقنوات التلفزيون…إذا طبق قانون الاحتشام يعني حتى التلفزيون يسكر لأنهم مب محتشمين اللي يظهرون فيه
وسلامتكم
أنا شخصيا ما اعتقد انه مستحيل
لكن أهم شيء هو تعريف الاحتشام … أو بالأصح تعريف التعري
المشكلة أن الناس مع انهم يقرون الكلام اللي أنا كاتبنه اللا انهم يرجعون للكلام المترسخ في الرأس من قبل … فما في فايده !
والكلام مب موجه لك شخصيا يا عادل لكن للكل
وجهة نظري :
في كثير من المواقف تكون الحرمة لأببسة عباه ونقاب بس مصدر للفتنه وهذا أكبر تعري بحيث يكون الويهه مصبغ من كل شيء وعدسات و….الخ وتكون العباه واسعه بس من النوع اللين اللي يطيح على الجسم ومعظم الأوقات يبرز الملابس الداخلية واللي تحتها والعيون عليها حدث ولا حرج
مع إنه في نفس الوقت لو مرت اجنبية لابسه تنوره وقميص نص كم وشعر يفرفر بس ما تكون مب محور جذب للعيون
السلام عليكم. أنا اشوف كلام اخوي عادل صحيح ماتقدر اتسوي شيءﻻن من البدايه كان في تساهل.
خلاص عيل إنتهى الموضوع
لبس النقاب والعباه الواسعه مب حل
المفروض اول شي ننمي مفهوم الحياء بين الناس وعقب بروحهم بيحتشموا
المفروض الحرمه تستحي انها تطلع مفاتهنها من ابوها واخوانها واعمامها وعقب تلقائيا بتستحي من الاغراب
والاحتشام مايشمل الحرمه بس
المفروض الرياييل بعد يحتشموا لأن هالايام نشوف رياييل لبسهم فاضح مانعرف قاعدين يحاولون يجذبون منو ، ف نشوف ريال حاف صدرة ولابس قميص ضيق والقميص مفتوح لين بطنه و هذا من غير البنطلون الضيق او القصير لين فوق الركبه
نشوف رياييل لبسهم فاضح مانعرف قاعدين يحاولون يجذبون منو
أقسم بالله هذا احلى تعليق … صدق والله اغراء … بس لمنوه … المره اليايه بسأل واحد منهم 🙂
السلام عليكم ،
السؤال اللي يخطر في البال ، التعري و الاحتشام مربوط في الملابس بس !
الملابس أوضح … ولكنها الملابس والتصرفات … واعتقد من سينتبه للبسه سينتبه لتصرفاته … والعكس صحيح
و الله الدنيا كلها تناقض ، يعني أطالع حوليك تشوف وأيد محتشمين في لباسهم بس كل تصرفاتهم تعري و كتيير بعد يلبسون عادي و محتشمين في تصرفاتهم ، يمكن التعري هو تعري الفكر و التقليد الغبي الأعمى
إلاحتشام يعني الاحترام
الشخص المحتشم يحترم نفسه أولا
المحتشم يحترم المكان اللي هو فيه
المحتشم يحترم انه هو في مكان فيه كل الفئات وكل الأعمار
المحتشم مرآة عاكسة لأخلاقة وتربته وبيئته
مقدار احترامك يكون احتشامك
تراه هذا بيت القصيد … أخلاقهم وتربيتهم وبيئتهم دخيله علي أخلاقنا وتربيتنا وبيئتنا … مب لازم حد يقوله؟!!!
الموضوع ما يباله تفكير أنا معاك فكل كلمة فهالموضوع
رحت أمريكا من جريب والحريم عندهم نادرا ما يلبسون شيء يوصل للركب أو يعديها وعندنا الحمد لله أكثرهن لابسات شيء طويل بس بعد مرصص
فالأجانب بعد فاهمين الموضوع غلط
واقتراحي مثل اقتراحك