ما معنى “عطْبِه” و “دورَهْ” ؟! … سلسلة معاني وكلمات عاديه ولكنها منسيه !

العطبة هي ريحة شي يحترق … شو هوه ؟!

والدوره شي له علاقه بالأكل … يقولون “فيه دوره في أكلكم؟!”

هذي كلمات عادية كانت تنقال بشكل عادي قبل سنوات لكني أحس اليوم يوم أقولهن وكأني من أصحاب الكهف أو إني لحقت على الغوص!

نحو مجتمع خال من “الضو مب طايع يلبق”


الجواب:

العطبة: هي ريحة النايلون المحترق … وكانوا قبل يطبخون على ضو ويمر … فإذا شموا ريحه غريبه عرفوا أن شي طاح في الضو أو أن شرارة من اليمر أو الضو طاحت على شي … والعطبه صح هي ريحة وايرات الكهربه يوم تحترق لأن اللي يحترق والريحه هي ريحة النايلون لي على الوايرات ومب ريحة الأسلاك الكهربائية نفسها … والعطبة مب ريحة الخلقان المحترقة اللا إذا الخلقان فيها نايلون أو بوليستر.

الدوره:
يوم يعزم واحد صديق له مار عليه البيت بعد صلاة الظهر … يقول له ما يستوي تغدى عندنا ، عدانا طايح … فيرد عليه ويقول له “أخاف غداكم مافيه دوره” يعني بكل بساطه ما يكَفِّي

وشكرا لتواصلكم

مع تحيات:

الــــــــوطــــــــن™
اتبعني Follow @AlWatanUAE
www.alwatan.ae