بيض و طماط .. لا لا هذا ليس موضوع عن وصفة طبخ .. ولكنه عن الرنج واللكزس

“لا حبيبتي البيض وايد غالي .. باخذ شدّه صغيرة مؤقت لين ما يرخص البيض”
 بصراحة لما سمعت هذا الشاب اللي ما بلغ الثلاثين من عمره يقول هالكلام وهو يكلم زوجته على التلفون وواقف أمام ركن البيض في الجمعية خفت لأنه أنا بعد ناوي أشتري شدة بيض .. ومشيت بخطوات حذرة جداً جهة البيض .. وأبتسمت .. لأني الحمدلله أقدر أشتري بيض وما راح يؤثر وايد على دفعات أقساط السيارة .. لأن سعر البيض طلع مرتفع درهم واحد فقط .. الحمدلله يعني راح أفطر بيض في الصباح كالعادة بإذن الله

أستغرب من بعض الناس يستغلي درهم زيادة في بيض وممكن ما يفطر بيض الصبح لا هو ولا أهل بيته ولكن عادي عنده يشتري سيارة قيمتها 700,000 بيضه .. طبعا بنفس مبلغ السيارة يقدر يستهلك عشر بيضات يوميا لمدة 200 سنة .. وطبعاً هذا الموضوع محيرني من سنوات وفكرت فيه كثير ولكني لم أجد له سبب مقنع .. فلماذا يا ترى يصرف الخليجي مبلغ خرافي من المال على سيارته ويستغلي على نفسه بعض الأكل لو أرتفع سعره شي لا يذكر؟!

وطبعاً ليس فقط البيض .. خذ الطماطم مثلاً أو الطماط كما نسميه في الإمارات .. تجد الناس تمضي ربع ساعه تنقّي الطماط لتنتقي الصالح منه .. مع أنه بإمكانهم شراء وما بقول الطماط الهولندي الغالي نسبياً ولكن الطماط الماليزي الذي يزيد سعره بمجرد درهم أو درهمين بالكثير أحياناً ولكنه أجود من الطماطم العادية بعشرات المرات

وحتى الطماطم الهولندية .. مالذي يمنع المواطن الخليجي من شرائها للسلطه مثلاً .. فالكيلو عادة ب 18 درهم .. أووف غالي .. لكن عادي عنده يطلب في مطعم سلطه بـ 40 درهم تحتوي على نصف طماطاه هولنديه وورقتين خس مستورد .. سر عجيب وغريب .. الفلوس نفسها والشخص نفسه والمعده نفسها .. لكن عندما يأكل في مطعم فهو يأكل لسبب آخر غير الأكل طبعاً .. أحياناً يكون السبب أنستجرام وأحياناً سناب شات .. وأحياناً عن يقولون عنه الناس بخيل !!

ويبقى طبعاً أعظم شي عجيب لا يمكن تفسيره ولو أجتمعوا علماء أمريكا واليابان وألمانيا وهو .. الكرك

لا لا ما أقصد حب الناس الغريب للكرك .. وللأمانة أنا ما أشرب ولا أستسيغ الكرك ولكن الناس أذواق فعليكم بالعافية .. ولكن الشي اللي حيّر العقلاء هو كيف أن المواطن يوقف عند محل الكرك في موتره اللي قيمة رقمه تضاهي قيمة السيارة نفسها أحياناً ويطلب شاي كرك ويمكن خبزة باراتا .. ويا ويله بابوه لو غلط  ورجّع له درهم واحد بدل الدرهمين اللي المفروض يرجعهم .. عادي توصل لمخفر الشرطة .. وطبعاً من المستحيل يقول له خل الدرهمين حقّك .. لكن نفس المواطن يروح كوفي شوب ويحط السويج (مفتاح السيارة) على الطاوله ويعزم ربعه ويفر نوط بو ميتين (200 درهم) ويقول للفلبينية خلي الباقي !!

غداً صباحاً راح ألوّح بسندويشات البيض ، لأني أفطر وأشرب قهوتي في الدرب للعمل ، عندي أكثر من ساعة أستفيد منها في الأكل دام استخدام الموبايل ممنوع .. المهم راح ألوّح بسندويشات البيض لكل واحد راكب رنج ولكزس في الشارع هههههههههههه

مع تحياتي

عــبداللـه @ الــــوطــــن™