الطفل أو الياهل مثل ما نسميه يوم يحصل لعبه يديده ما تطول معاه حتى لو كانت أحلى لعبه … بالكثير شهر … وعقب واللا يودرها ويصيح يبغي لعبة يديده … أو الأغرب وهو ما يحير العلماء … يطلّع لعبة جديمه ويبدأ يلعب بها !
الياهل أحيانا حتى لو كانت اللعبة يديده وحلوه ومستانس منها وعايبتنه اللا انه وبدون سبب يكسر اللعبه ويتلفها … وتنتهي اللعبه واللا زباله في الشارع أو يأخذها واحد فقير ما كان يقدر يدفع قيمتها لو لا أن ولد العز بطلها من كرتونها وكسرها !
لكن تعال نشوف الريال العود أو الشيبه وحالته ويا الألعاب … حد بيقول لي شو يخص الشيبه في الألعاب … وبقول لك مسكين … معظم الشواب اليوم يوم يشوف لعبة يديده يقول هيه أيامنا ما كانت الألعاب حلوه جذه … الحين أنواعها مختلفه … ألوانها متعدده واشكالها جذابه … يقول هيه ياليتني أرد ياهل وألعب بلعبه يديده !
لكن تعال شوفه لو حصل لعبة يديده أو حتى لعبة فارنها ياهل … تحصله يحافظ عليها واذا كانت مكسورة شوي يحاول يصلحها … ونادر جدا أنه يكسرها أو يودرها ويرد للعبه جديمه … لأنه يقدر قيمة الألعاب ويعرف كيف يلعب باللعبه ويستمتع بدون لا يكسرها !
لهذا السبب بعض الألعاب لو كانت تقدر تنطق وتختار … تقول أبغي ريال شيبه يلعب بي ولو مب وايد ويحافظ علي ويقدر قيمتي وما أبغي ياهل يلعب بي وايد كم يوم وعقب يفرني مكسّره في الزباله ما أسوى فلس … لا واحيانا بعد ما يطلع القطع الصغيرة لي في بطني!
نصيحتي لكل ياهل … حافظ على لعبتك الحلوه … واللا أخرتها بيلعب بها الفقير أو الشيبه
مع تحيات:
الــــــــوطــــــــن™
اتبعني Follow @AlWatanUAE
www.alwatan.ae
الـكـشـكـول 
التشبيه جارح شوي الحرمة ( لعبه ، يفرها ، يكسرها ، يودرها )
بس واقع وحقيقة .
كلام مقنع
أحيد الحرمة مشبهينها بالسيارة.. لكن كلعبه!! هاي يديدة.. بس الريال.. الحمل الوديع ذو الوجه الملائكي.. إلي ما يخصه بالسلبيات.. مكمل من مجميعوه!! ما له تشبيه هو بعد!!
عيب المرأة من عيب الرجل .. لأن هو الاصل وهي الفرع ،
وشكرا
هذا المقال يتكلم عن الرجل وليس المرأه … يرجى اعادة القراءة مع التركيز
صح مقالك يتكلم عن الريال بس في النهايه مشبه الحرمه باللعبة
يعني أختك وأمك وزوجته ترضى ان تكون لعبه
السموحه من كل من لم يفهم ما كتبت … ورجاء لي ما فهم أو يفهم أي شيء مما أكتب … ما عليه اللا أن يسأل ويطلب توضيح … بعيد عن التجريح وبدون ذكر الأم … هداني وهداكم الله
ووالله لو أيقنت الزوجه وادركت كيف تكون لعبة جيده لزوجها … لدخلت الجنه
كلام صحيح وواقعي للأسف
سواء كان الموضوع عن الريال أو عن الحرمه احس نفس الشي.. يقول لك اليديد حبه شديد يعني اي شُــــيےْ يديد الواحد بيتعلق فيه لين مـِْ♡̨ـِْا يحصله ومن يحصله يحلى بعينه اللي بايد غيره.. مثل مـِْ♡̨ـِْا الياهل يطمع حتى الشاب والشايب بعد يطمعون..