هذا عداد سرعة لكزس وارد وهو منتشر بكثرة عند المواطنين ولو تلاحظون فإن السرعه مبينه انها أقل من 140 كم/س .. ولكن إذا مشيت أعلى من هذه السرعه ولو بشعرة بيصورك الرادار
ما تهم سرعة عداد أي سيارة لأن الرادار يصوّرك إذا تجاوزت سرعة 136 كم/س على قياس الجي بي إس GPS وهي السرعة الحقيقة للسياره هناك حتى بعض السيارات الخليجيه التي يمكن يصورك الرادار حتى لو كنت تمشي 140 كم/س على عداد السرعة
أغلب الموبايلات الذكية لها برامج لقياس سرعة السيارة باستخدام الجي بس إس اللي في التلفون وهو دقيق جداً
وإليكم السرعات الآمنة بدون لا يصورك الرادار:
- إذا كانت سرعة الشارع 60 أو 70 كم/س فإن ضبط الرادار يكون على 80 كم/س فلا تتجاوز سرعة 75 كم/س على الجي بي إس
- وإذا كانت سرعة الشارع 80 أو 90 كم/س فإن ضبط الرادار يكون على 100 كم/س فلا تتجاوز سرعة 95 كم/س على الجي بي إس
- واذا كانت سرعة الشارع 100 كم/س فإن ضبط الرادار يكون على 120 كم/س فلا تتجاوز سرعة 116 كم/س على الجي بي إس
- واذا كانت سرعة الشارع 120كم/س وضبط الرادار طبعاً 140 كم/س فلا تتجاوز سرعة 136 كم/س على الـ GPS
طبعا أنا أوصل للسرعة اللي ما يصورني فيها الرادار مثل 136 كم/س على الجي بي اس وبعدين أثبت السرعة .. ولكني ما أنصح أي حد يسوق بعض السيارات المعروفة بأعطال مثبت السرعة فيها بأستخدام مثبت السرعة .. وعموما اذا كانت سيارتك مزودة بنظام Stability control system فلا أنصح باستخدام مثبت السرعة .. وهذاالكلام من استنتاجي الخاص طبعا وما عندي أي أثبات عليه .. للمزيد عن موضوع مثبت السرعة ومشاكله أضغط هنا
انتبه وانت تستخدم الهاتف أثناء القيادة ولا تخلي هوسك لتفادي الرادار يسبب لك حادث لا سمح الله ..
لذلك فأنا أنصح بشراء جي بي إس مخصوص للسياره بحيث يثبت على زجاج السياره وأفضل نوع طبعاً هو جارمن Garmin وهو متوفر بسعر معقول في كيرفور .. أرخص عن مخالفة رادار وحده
سرعة عداد سيارتي ومع اني متجاوز 140 كم/س على العداد اللا ان الرادار ما يصورني لأنني لم أتجاوز سرعة 136 كم/س على الجي بي اس GPS
مع تحيات:
الـكـشـكـول 
يعطيك العافيه ؏ المعلومه
اول مرة اعرفها
يسعدني أنني أقدر افيدكم
كلامك صحيح
وأمس جربت و صورني الرادار قبل ما اقرأ كلامك
الله يجعلها دفعة بلاء إن شاء الله
السموحه بس كلامك هب صح بالكامل. لاني دايم اروح العين والرادارات في خط العين يصورن. 161 . وانا اثبت سرعة السيارة على النفقيشن وعلى التلفون(الاثنين نفس الشي ) على 159 وعداد السيارة على 168 تقريبا وولا رادار يصورني. ويربت ها الحركة على خط دبي ونفس الشي بس على سرعة 139 على النفقيشن وولا رادار صورني.
أنا من المتابعين لك واشكرك على مجهودك. لكن حبيت اقولك تجربتي والسموحه
خطوط أبوظبي الخارجية غيروا السرعات من 161 سابقاً الى 141 من أكثر من سنه
أما بخصوص تثبيت السرعة على 139 فكلامك قد يكون صحيح ولكن من تجربتي وخبرتي على رادارات الدولة كلها فبعض الرادارات تخترب بعد مده لأنهم ما يسوون لهم معايرة دورية المفروض كل ستة أشهر ولذلك فأحياناً يصورن على 137 قبل لا ينتبهون ويعدلونهن ولذلك أنا قلت 136 وهي تقريباً سرعة مضمونه وما يسوى المغامرة بكيلوين أو ثلاث زيادة ويطلع الكيلو بميتين درهم أغلى من بيع السوق ، وهذا ما حصل مع أخوي العود لين ما تعلم بعد ما دفع 2400 درهم في شهر واحد فقط لأنه كان يمشي 138 وكانت أغلب الرادارات ما تصورة اللا واحد خربان صاده صيد وطبعاً هيهات تثبت هذا الشي للجهات المعنية وتدفع تدفع والحين يمشي 136 والحمدالله الامور طيبه
كنت أتوقع حد بيقول لي هالكلام وأنا فضلت ما أكتب هالجزئية في الموضوع لسببين أولا علشان ما أعقد الموضوع وثانياً لأني ما أحب يطلع الكلام كأنه أنتقاد لأي جهة
وشكراً لمرورك ومشاركتك فبمشاركاتكم تثرى المواضيع
بخصوص انك تقول الرادارات كلها تغيرت الى 141 .. كلامك غلط!
طريق ابوظبي العين لين الحين سرعته 161 يالطيب.. وموضوعك حلو واستمر
حسب الاعلان الرسمي لمرور ابوظبي فقد تم الغاء سرعة ضبط الرادار على ١٦٠ ولا اعلم صحة كلامك ، وهل تقول بأنه حالياً هناك لوحة على الشارع تقول بأن سرعة ضبط الرادار هي ١٦٠ كم/س ؟!
أريد مساعدة أجوكم أنا سياراتى وارد اليابان هل عداد سيارة وارد اليابان مختلف عن عداد وارد الخليج لأن شخص بالمرور قال لو سياراتك وارد اليابان العداد مختلف عن الخليج مثلا لو الشارع اقصى سرعة 100 انا لازم أمشى على 75 كلام صحيح أم خطأ
الموضوع يشرح هذا بارك الله فيك
السلام عليكم .. اخوي الغالي، عندي لك سؤال مهم جداً ابيك تجاوبني لو ما عندك مانع …
مرسيدس موديل 2017 ماشي بسرعة 140 كم ..
وباص صغير او قول اي موتر عادي ماشي على نفس السرعه 140 كم ..
هل يمشون بنفس السرعه يعني ينب بعض ؟ ام مرسيدس بيكون اسرع ؟ اذا كان اسرع، فالباص الصغير او الموتر العادي كم يبي له عشان يكون مساوي لسرعة مرسيدس 140 ؟ (في ناس قالو لي 150 والبعض 160) اذا مشت الموتر العادي 160 عشان يكون ينب مرسيدس الرادار طبعا يزخه على اساس 160، وهل ما بيصور مرسيدس ؟؟ اذا ما بيصور مرسيدس بس يصور الموتر العادي، فاشمعنى يصور الموتر العادي ولا يصور مرسيدس رغم انه ثنتين ينب بعض بالضبط ؟؟
ااتمنى ترد علي سؤالي، لأنه عندنا جدال كبير هههههههههههههه بحفظ الرابط عندي عشان ارجع اشوف الرد
وعليكم السلام،
إذا كنت تقصد كلامها يمشون بسرعة 140 على عداد السرعه الداخل للسيارة فأغلب الظن ان المرسيدس وأغلب السيارات الجديدة وخصوصاً الغالية تمشي بسرعة أقرب للسرعة الحقيقة أما الباص او السيارة العادية فقد يكون الفرق أكبر بين سرعة عدادها وسرعتها الحقيقة .. وأقصد حقيقية اي بالجي بي إس.
ولكن كم الفرق لا أعلم ولا يمكنني الجزم بدون قياس سرعة السيارتين بالحي بي إس.
اي سيارة سيصور الرادار .. إذا كانوا يمشون بجنب بعض ونفس السرعة بالضبط فالرادار سيصور سيارة واحدة فقط .. ولكن اي سيارة بالضبط لا يمكن الجزم .. ولكن بعض الرادارات الحديثة يمكنها تصوير أكثر من سيارة في نفس الوقت.
الرادار لا يعرف كم السرعة الداخلية لأي سيارة ولا شأن له بها .. الرادار مضبوط على سرعة حقيقية معينة لا يعلمها إلا الله والمرور .. متى ما تم تجاوزها يصورك الرادار .. ومتى ما عرفت كم هذه السرعة يمكنك حينها تفادي المخالفات .. والأرقام المذكورة في الموضوع هي في دولة الإمارات فقط.
طبعا اخوك من الامارات الغالي … تسلم على ردك اليسريع .. بس في ملاحظات بسيطه ..
طبعا موترين يمشون ع 140 الحقيقيه يعني موترين حتى ولو موتر العادي تم صيانته عشان العداد يكون 99% صحيح مع السرعه الحقيقيه مثل حالة مرسيدس او قول سياره عاديه حديثه موديل 2017 مثل كامري..
ثاني شيء. طبعا يختلف على حسب نوع الرادار وحداثته يعني ييصور موتر واحد او موترين بس القصد لو موترين ينب بعض مخالفين السرعه الحقيقيه هل بنظر الرادار موترين مخالفين ؟؟ حتى ولو صور واحده ؟ يعني مثلا عندنا جدل يقولون الموتر العادي يحتاج 160 كم في الساعه عشان يكون ينب مرسيدس الي ماشي على 140،، فالموتر العادي طبعا يكون مخالف للسرعه وعلى حسب رأي انا و( رأيك) مرسيدس ايضا بيكون مخالف دام الثنتين ينب بعض والموتر الاولاني مخالف.
لكن عندنا يقولون لا مرسيدس مب مخالف بل الموتر العادي .. اتمنى ترد علي ..
وحبيت اسألك، جربت الجي بي سي الي بالفون ؟؟ هل هي صحيحه مثل جي بي سي جارمن ؟؟ لأني احيانا استخدم جي بي سي الفون في مواتر ثانيه واخاف يزخني الرادار هههههه.. وتسلم مره ثانيه على ردك الغالي
مثل ما قلت لك قبل السرعه الحقيقة لا علاقة لها بسرعة عداد سرعة السياره .. يعني هل كانت السياره تمشي بدون عداد سرعه فهل سرعتها ستكون صفر.
ثم أنه صدقني الرادار ما يعرف الفرق بين الكامري وبين المرسيدس
أما لو قلنا صوره وحده لسيارتين يمشون بنفس السرعه فلمن المخالفه .. قذ تذهب للسيارة الأقرب للرادار أو للي حجمها أكبر او اللي فيها زوايا أقل ولكن ليس للموتر الأرخص بكل تأكيد
ونعم جي بي اس التلفون سيعطيك سرعة صحيحه نفس سرعة الجارمن او اي جهاز ملاحي آخر