الخيانه الزوجيه – السحر – الدعاره – ليش يسيرون الشباب والشياب بعد لهذه الأماكن وألاشياء؟ لا تيود الحنيش من ذيله !

كل ما طلع موضوع مثل هذا في الإعلام نقزوا الحريم وبعض الرجال بعد .. وطلعوا الأسطوانه المغبره .. وبصراحه مليت ولاعت گبدي من سماع نفس الأغنية !

أدري كلماتي التي بكتبها هنيه بتخرب إيقاع الأغنية التي تعودتوا عليها ولذلك بتوصلني الكثير من الانتقادات … ولكني جاهز … لأنه اللي بيدش البحر لازم بيخرس سواء كان يجيد السباحه أو لا … لكن أتمنى من اللي بيرد علي يحاول يفهم كل كلامي وبعدين يرد … ويبتعد عن التجريح في ردوده … وتذكر أني أتكلم بصفة عامه عن الوضع العام وما أتكلم عن حياتك انت الشخصية … ويله نبدأ …


أيــــــام الغــوص

يمكن وايدين يعتقدون أن موضوع الدعارة وذهاب الرجال لهذه الأماكن لممارسة الرذيلة خارج نطاق الزواج شيء حديث ، ولكن الحقيقة أن بيوت الدعارة كانت موجوده من أيام الغوص ولو لم يكن لها مرتادين لما وجدت ، وما بقولكم شو كانت جنسيات العاملات بهذه البيوت عن تأكلوني بعد ، وأكيد ما بقولكم شو كانوا يسمون لي يشتغلن هناك عن يتحول الموضوع إلى “عيب عليك ما يستوي نقول هالكلمه” تقول عاد أنا عايش في المريخ .. تراني عايش ما بينكم واعرف كيف تتكلمون وشو تقولون وأي كلمات تستخدمون .. أونه ما نقدر نقول أو نسمع هالكلمات .. ظريفين والله !

لكن للأمانه لا أعلم عدد أو مدى انتشار هذه الأماكن قديما ولا أعرف نوعية أو عدد مرتاديها من الرجال .. لأنه محد سوى بحث تاريخي عن هالأماكن وما اعتقد حد بيسوي ☺ بس المهم كانت موجوده.


التاريخ الحديث

باختصار الموضوع نسبة وتناسب وزيادة في الطلب أدت إلى زيادة في العرض … يعني … زاد عدد السكان فنسبة وتناسب زادت هالأماكن … وزادوا العزابية فأكيد زادن اللي يشتغلن في هالأماكن واللي يشتغلون الشغله هاذي .. معناته النتيجه طبيعيه .. لكن مب هذا موضوعي !


المهم هو لماذا يلجأ شبابنا ورجالنا لهذه الأماكان طلبا لهذه الأشياء ؟!

ومن الحين بقولكم السبب الرئيسي لذهاب الشباب والشياب لهذه الأماكن هن النساء الحريم البنات الزوجات والأمهات … يله نشوف ليش ؟


قبل الزواج …

□ تأخر سن الزواج البنت والسبب طبعا البنت نفسها لي تبغي تكمل دراستها والأم لي تعاونها على هذا وتقول: “أدور مصلحة بنتي”

□ غلاء المهور والسبب البنت والأم ولو أن دور الأم أكبر ، وحتى يوم يقول أبو البنت ما أبغي عليكم شيء والبنت بنتكم .. بعد الحريم يقصون ظهره بما فيهم أمه ، لأنها تبغي تتبطر جدام الناس ولو على حساب ولدها!

□ تأخر سن زواج الولد والسبب طبعا الأم إضافة إلى الأب ولو ان دور الأم أكبر .. لأن لو الأم تبغي تزوج ولدها .. والله تطفره لين ما تزوجه .. لكنها تقول: “بعده صغير ما يفتهم .. خله يستمتع بحياته قبل لا يرتبط” سبحان الله !

□ أغلب الأمهات يقولن .. الزواج عذاب وانا متزوجه أكثر من ٢٥ سنه وعايشه في عذاب ونكد وتزوجت وانا ياهل ما افتهم .. فليش أعذب بنتي وهي بعدها صغيرة!

□ الغريب مع أن عدد البنات أكثر من الأولاد وعدد العوانس رقم فلكي مع أني ما اقتنعت بالرقم لكن بعد الريال يحصل صعوبه يوم يدور على حرمه تستره

□ في بعض البيوت توصل البنت ثلاثين وبعدها الأم تقول:” نتريا للبنت الزوج المناسب لي يناسبنا”

□ وألاغرب من هذا كله أن الكل يتكلم أن الشباب الصايع الضائع .. وما أنكر النسبة أكبر .. لكن هناك بعد عدد كبير من بنات المواطنين الصايعات الضايعات .. من ثمانينات القرن الماضي ونحن ننكر .. وما مب علي ولا حتى مقال واحد يتكلم عن هالموضوع !

يعني المشكلة مشكلة مجتمع كامل وليس مشكلة شباب .. فمن الظلم أن نرمي بكل المشكله على الشباب المساكين .. ونحولهم إلى متهمين مجرمين وهم الضحية .. ضحية المجتمع!


بعد الزواج …

□ الخزعبلات والوصايا الغبية التي توصي بها الأمهات بناتها وتوصي بها الصديقات المتزوجات الزوجه الجديده .. وكله على حساب الزوج المسكين الغافل !

□ أكثر عن مرتين في الأسبوع أكيد بيودرج !

□ لا توافقينه كل ما طلب .. واللا بيعافج !

□ أربطيه باليهال ومن تربين أحملي يكون يتم دوم مربوط .. هيه وصوهم .. ترى الأزواج يتخبلون على النفسية الخايسه للحامل والمتن أثناء وبعد الحمال!

□ سهر الزوجه بيت أهلها والتجمعات ويوم ترد البيت .. تعبانه .. وعقب تقص على عمرها وتقول: “تراني أسير الصالون أتعدل لمنوه .. لك حبيبي” عن الخرط يله!!

□ كل الزوجات يقولن نحن نسوي كل شي يبغيه زوجنا .. أنزين بالله عليكم .. إذا متعشي في البيت وين بيروم يأكل برع ؟

□ بعدين كيف تعرفون الزوج شو يبغي سألتوه ؟! يستغرب الزوج يسألونه شو تبغي تتغدى .. لكن أبدا ما يسألونه شو تبغي تتعشى في الليل !

□ الصحابية كانت لا تستحي أن تقول لزوجها : “ألك حاجة فيني” وماكان لتنام أو تسهر على الـMBC ولكن لتقوم الليل أو تصوم غداً !

□ الحرمه عندنا توصل الأربعين وخلاص .. تقول لزوجها دائما .. عنبوه انته ما تيوز عن سوالف إليهال هذي .. أنا جسمي ما يتحمل !؟

□ إذا الزوج طلب حقه في الزواج من الثانيه وكلم زوجته .. بدون تفاهم .. الرد دائما .. بتتزوج طلقني!؟

□ كل الحريم .. تقريبا .. يقولن:” خله يسير يسوي لي يبغيه بالحرام .. دام أني ما أعرف .. المهم ما أييب لي عديله”

□ إذا الزوجة حاولت تطلع من بيت أهلها من وقت أو من تجمع معين .. الأهل والصديقات يتغامزون ويمكن يوصونها ويقولون لها تأخري عليه علشان يحس بقيمتك .. تغلي عليه !؟

□ وشو عن الحريم لي يخونون أزواجهم .. وأدري أن النسبة أقل .. لكن يله ليش ما نهاجم كل الحريم ونقول أن كل الحريم خونه .. مثل ما نقول أن كل الرجال خونه لأن بعض الرجال خونه!؟


نعم الرجل هو المسؤول الأول عن ما يدور في بيته ومجتمعه ولكننا لسنا في ١٩٧٠ عندما كانت المرأة مسؤولة فقط عن بيتها .. المرأة اليوم تعلمت الرياده والقياده والاداره والوزارة وهي بذلك شريكة في بناء وتسيير هذا المجتمع .. أنا لا ألوم بكلامي المرأة .. ولكن من الظلم رمي أسباب إلمشكله على الرجال .. نحن لا نعيش في زمن غابر عندما كان الزوج هو الأمر الناهي .. فالزوجة اليوم هي الآمر الناهي وهي من يحدد كل شيء تقريبا .. ما عدا الطبيخ فلا زال الرجل يتحكم في “شو الغدا اليوم” … وبناء عليه فمقولة “أقصر الطرق إلى قلب الرجل بطنه” مقولة خاطئة .. فانتبهوا !!!


أدري كلامي هذا بيزعل الكثير من النساء لكنها الحقيقة البشرية .. نعم الرجال يحبون النساء وهو ما قاله الرسول عن نفسه صلى الله عليه وسلم .. نقدر ننكر الحقيقة .. وهو ما نفعله عادة ولكنه ما يحل مشاكلنا وما يوصلنا لأي مكان !


نصيحتي لكل زوجه .. إذا زوجك سار يتعشى برع البيت فالسبب الوحيد هو أن طبخك مب زين .. تعلمي تطبخين .. والسموحه !!

أقرأي أيضاً على الرابط التالي … 

 

مع تحيات:
الــــــــوطــــــــن™

www.alwatan.ae

46 تعليقات على “الخيانه الزوجيه – السحر – الدعاره – ليش يسيرون الشباب والشياب بعد لهذه الأماكن وألاشياء؟ لا تيود الحنيش من ذيله !

  1. الموضوع جميل ويعايش الواقع
    التدريج لأحداث المشكلة جدا رائع
    الأسباب تأخذ بعين المنطق و الإقناع
    بس عندي شيء أضيفه الريال ما يترس عينه غير التراب إلا من رحم ربي
    الريال لو عنده ملكة جمال وصاحبة دين وخلق وطباخة و مدبرة رائعة للبيت
    راح يدور لتشكيلة ثانيه ، طبيعة الرجل خلقت هكذا
    بس في اختلاف بين رجل ورجل آخر، رجل يتبع الحلال ورجل يتبع الحرام.
    انتهى

    • كوني كل مرة شي يديد .. شو اللي يمنع
      التغيير فن.. تتقنه الأنثى الحقيقية واللي سماها الوطن في مقال من مقالاته.. الطفلة
      مقولة ان الرجل مايترس عينه الا التراب صحيحة
      في حالة وجود انثى تعشق الروتين
      في رايي.. خلقت الألوان للمرأة لسببين..
      الأول.. من أجل اشباع فطرة المراة
      والثاني..من أجل أن يستمتع بها الرجل
      ملاحظة.. الألوان مجرد مثال فقط

  2. آللي متعود على اكل المطاعم … ما بيعيبه اكل البيت .. يبا للي هو متعود عليه … وما يقدر ياكل نفس الاكلة كل يوم .. ونفس الشي للي تعود اتكون عنده كذا وحده
    وللي يتزوج عسب اييب اعيال ، ويكون عنده ممثل رسمي في المناسبات العائلية والاجتماعية ، وهو طبعا مشغول بوصاخته واللوث للي عايش فيه
    لا تلقي اللوم على النساء فقط او الرجال فقط … فكل قصة خيانة لها سيناريو خاص وابطال مختلفين ….

    • للأسف ما فهمتي كلامي … أنا ما ألقيت باللوم على أحد .. ولكن عادة اللي عنده مشكله هو من يبحث عن الحل .. وكما وصلني فالنساء لديهم مشكلة مع أزواجهم .. والرجال لا يعانون من أي مشكله
      ولذلك لكلامي ليس لوم … أنما نـصـيـحـه
      فالبس عنده مشكله .. يدور على حل لمشكلته
      أما مجرد التحرطيم على واقع الرجال عندنا فلن يحل لكن أية مشكله
      أدري .. الحريم يعيبهن التحرطيم .. لكن وانتوا يالسين تتحرطمون في حد ثاني مشغول بكيف يرضي ويغوي رجالكم .. كيفكم تحرطموا!!

  3. هههههه فديت الحريم البريئات ،،، الريال يقوللكم يوعان،،، طبخج مب حلو والا يتعشى برع البيت ما يقصد فيها الأكل وإلا ترس البطون -_-”
    إذا هذا اللي فهمتوه فما ينلامون الرياييل،،
    الريال لو يبا وحدة تطبخ وتغسل وترتب بييب شغالة وإذا عن العيال بيتبنى مب مشكلة ،،، يبى وحدة تتلبسلة وتتعدل وتسويله كل شئ …………. الخ .. بس ،،، مب شوف وحراق يوف ع قولتهم،،،

    المهم بالعربي
    ريحيه،،، عطيه الليي يباه لو ١٠ مرات فاليوم -_-” شو بيغدي عليج

    • في الواقع الريال ما يبا وحده تطبخله كل يوم لكن لو حرمته تعطيه حقه من تقدير و تخليه يشوف أشياء هو يبا يشوفها كرجل ولو تطبخله مره في اﻹسبوع نهاية اﻹسبوع يغير مزاجه عن أكل المطعم/الطباخ/الخدامة بيستحي يطالع شرق و غرب، الرجل ما يباها تكون خدامة له لكن شو بيضرها لو حصلها يوم واحد الصبح مزهبه ثيابه و مدخنتنهن و معطرتنهن روحها حتى في الدوام بتكون نفسه طيبه مب إلا وياها، نصيحتيه للحريم تعلمن السحر الي دوم يخبركم عنه الريال الطيب راعي هالخدمة

  4. شكرا على طرحك هذا الموضوع لأنه فعلا قضيه مجتمع وطرحك للموضوع بصورة عامه جيد
    ومثل ماقلت اللوم الأكبر على المراه وسماعها لنضائح الآخرين ولكن للأسف ياريتها على الأقل تدرس حتى كنضائح من زمن الرسول صلى الله عليه وسلم بدل من تصادم المراه والرجل فى أمور الحياه الصعبه

    • أوه شكرا .. تقييم جيد لا بأس به
      أنا توقعت ردة فعل عنيفة لكن جيد زين

      لأن الناس عادة لاتقبل اللا سماع ما تعودوا عليه
      والأفكار اليديده مثل الأكل اليديد …
      حتى لو كان حلو لكن الناس تخاف تتطعمه

      • ماادري ليش دائما مواضيعك حلوه بس ردوذك ردود شديده اللهجه كأنك ترد على ناس ماتفهم

      • أعذرني إذا ردودي عطتك هالانطباع
        ومعاك حق الردود عادة سريعة ومستحيل تكون بنفس مستوى الموضوع
        لكن حاول تتخيل أني أكتب مواضيع واقرأ وارد واقرأ أخبار واحطها على المدونه ….. الخ.

        وعندي عائلة والتزامات واطالع مباريات وووووو
        وانا شخص واحد فقط … وشكرا لمرورك

        للعلم كتبت هذا الرد وانا اتشرى في الجمعية

  5. أسمعوني شوي بنات حواء ،
    أعيد وأزيد الريال ما يترس عينه غير التراب ،
    واللي قالت كوني له مثل الطفلة ، أوكي أنا طفلة وأحب التغيير لكن هو حضرة جنابه يحب كل أطفال العالم بكل جنسياتهن وثقافتهن وألوانهن،غريزة بالرجل ما نقدر نتكرها ،
    بس في اختلاف بين رجل ورجل آخر في الحلال والحرام ،
    الرجل الحلال بتبع طريق مثنى وثلاث ورباع إذا كان عادل أما إذا كان يخاف إلا يعدل فيكتفي بالواحده ،
    أما رجل الحرام فيتبع شهواته بالحرام سواء بالنظرة، بالضحكة ، بالشات ، بالمكالمات الهاتفيه ، بالزنا ،

    فهمتوا يا بنات حواء !

    • مب كل الريايييل جي !!! الحرمة الشاطرة واللي تعرف تأسر قلب زوجها مستحيييل حتي يفكر فـ غيرها حتى بعد موتها ،،، وعندنا مثال فالعائلة ،، ولد عمتي ما رضى يتزوج عقب ما توفت حرمته معنه كان بعده شاب وما عنده عيال ولا شئ ،،،

      اللي تقول الريايييل جي ومقتنعة بهالكلام بتتقبل فكرة خيانة زوجها لها،، وبتهيئ له الظروف عشان يخونها

      ” لا تمارضوا فتمرضوا “

      • أنا ما قلت كل الريايل جي !
        عيدي قراءة ردي مرة ثانيه !
        أنا قلت إلا من رحم ربي
        رجل عن رجل يختلف
        وحرمة عن حرمة تختلف

  6. بقول رأي وأتمنى ماتتحرطم ☺
    انت الآن الأرجل وحطيت السبب على الحرمه أؤكئ مأاعترضنا
    فبدل لاتتحرظم قول الحل وبدون تحرطم مب بس تقول أنه الحرمه السبب
    يإخى المشكله مشكله رجل وأمراه

    • أنا ما قلت السبب من الحرمه !!

      بكل وضوح قلت ان المشكلة مشكلة مجتمع

      الحل قلته وحاليا هو أكثر المواضيع قراءة في الكشكول بعنوان “سحر الأزواج” لكن للأسف قليلات لي يعرفن يطبقن هذا النوع من السحر .. الأغلبية تحرطيم وبس

      وإلله ما شرد الرياييل من البيوت شيء أكثر من التحرطيم !؟

    • الرجل بصري بنسبة 70% ولذلك هو يحب كل ألوان النساء وفعلا هذا شيء محد يقدر ينكره..هذي خلقة ربه
      اذا كنتي تتقنين فن التغيير وتعيشين مع رجل مايقدّر حبج وصدقج في العطاء ومن جانب آخر مايخاف الله ويلعب
      فهذا ابتلاء يستوجب التعاطي معاه بفن آخر..
      وهو فن التعامل مع الرجل العابث..
      ومع الدعاء والصبر ومحاولة التغيير بتكون النتيجة عكسية تماما بإذن الله
      ممكن حد يسأل ..ليش الحرمة هي اللي لازم تتحمل؟
      لأنها هي الربان الحقيقي للسفينة وهي اللي ادّير دفة الحياة للأفضل أو الأسوأ ودائما موقفها هو اللي يؤثر على مصير الأسرة
      خالص احترامي

  7. نفس ماالريال يبا الحرمه تهتم فيه تري الحرمه هي من تحتاج الحنان والدلع والرومنسيه في ريايل عادي الكلام الحلو يكون للغِير بس في بيته يكون الانسان القوي سي سيد
    قدوتنا الرسول عليه افضَل الصلاة والسلام كيف كان يعامل نساءه كيف كان يحن عليهم لو الحرمه حصلت من الريال المعاملة الزينه فمستحيل تهمله ومادلعه كل اللوم ع الريال لان الحرمه عقلها نفس الياهل يبا كلمه طيبه حتي لو جذُب الله يهدي شَبابنا وبناتنا تري الدنيا قصيره مهما شَفناها فعو نا طويله كلنا ميتين والله يشَوف منو الظُالم ومن الظُلوم

    • أقروا كل السيره مب بس الصفحات لي تعجبكم
      في السيره الرسول والصحابه كانت عندهم أكثر من زوجه

      أقروا بعد الجزء اللي كان الرسول بيطلق كل زوجاته .. وشوفوا ليش حتى الرسول يتأثر مثل ما يتأثر باقي البشر .. أقروا !؟

    • يحليل الرياييل يعني مب كافي أن الزنا من كبائر ألذنوب. اللي يستهين في.أمر رب العالمين يعني بتمنعه حرمة من الحرام.
      وبعدين حتى الريال لو ما اهتم في نفسه ترا الحرمة تعافه
      كانوا الصحابة لما يون من الحروب أول شيء يعدلون في أعمارهم وبعدين يسيرون عند حريمهم. – اتزين لها كما تتزين لي – بس الحين كرشته برا مترين وشكله ما شاء الله ويدور ملكة جمال وبالحرام بعد

  8. ههههههه منو أقترح نسفر هذيك الجنسيه برع البلاد ، إي حرمه ؏ وجه الارض قادره تغوي الريال مب شرط مواطنه ولا غير مواطنه . و ليش الريال يتعشى عند ذيك الفئه بالذات لان طباخهم حلو
    ف نصيحه لكل أخت حافظي ؏ زوجج لان الدور الاكبر ف شرود الريال من البيت الحرمه ألا تقولوا أالوان و طفله و حركات ما تيب راس الريال كل حرمه تقدر تاثر ؏ ريلها بطريقتها شرات ما قال المثل ولدج على ما تربيه و ريلج على ما تعوديه. و كان الله غفور رحيم

    • هذا هو البرودكاست المنتشر للأسف .. وبيوصلكم أكيد … برودكاست سخيف وما منه غير فايده وحده فقط لا غير .. ومحد يسألني شو فايدة هالبرودكاست .. لأني مستحيل أقول

      …………………
      إليكم البرودكاست المنتشر
      …………………

      ذكر في تقرير نشرة الأخبار إن البداية في مقهى أو كوفي تعمل فيه مغربيه

      تبدأ باستدراج الكبش (الخروف )
      حتى تبدأ علاقته معها خارج نطاق الكوفي
      ثم تستدرجه فالشقه حتى يقع في شباكها
      فتحتفظ بسائله المنوي لتبدأ أنواع السحر
      ثم تتوالى هدايا الكبش (الخروف ) لها

      وما قد ذكر في النشره

      أن هذه الفئه تعمل نادله في مقهى لكنها تمتلك سياره فارهه والعديد من الهواتف المحموله كما عثر في الشقه على دفتر شيكات

      يعني عزيزي الكبش إذا مآعندك كاش نستقبل شيكات

      كما عثر على العديد من أعمال السحر التي كما ورد عن المسؤولون قد دمرت أسر وفككت أسر وشردت أطفال

      حالات طلاق وقعت بسبب هذه الشقه
      أطفال تم قطع النفقه عنهم لان امبااااااع ضااااااع

      لكن سؤالي

      من سمح لعمل المغربيات في الكوفيات والمقاهي
      وهل صاحب المقهى لا يعلم بما يأتي من ورائهم

      أصبح للنادلين الهنود سنوات فالعمل فالمقاهي ولم يحصلوا على سياره خشبيه وتأتي المغربيه بطلاسمها واسحارها وتركب أفخم من سيارة الكبش اللي يقود سياره أقل منها رفاهيه

      عتبي
      على المسؤولون عن ذلك
      أصبحت الكوفيات والمقاهي مراتع للفساد
      ولاستدراج الشباب من فئه قذره
      إلى فئات أقذر

      ولازلنا مكتوفي الأيدي
      لان عدد كبير من المقاهي يوظف هذه الفئه
      المنحطه في بلدنا هل لاستقطاب الزبائن لشرب القهوه أم لاستقطاب المزيد من منحطي الأخلاق
      لسد الشهوات!

      أم إن حمل القهوه إلى الزبون تصعب كثيرا على العامل الآسيوي الذي يعيل أسره فقيره بدلا من فتاه أتت من عالم ألسحر والشعوده لعملها بوجود خرفان دفِّيعه !

      هنيئا لكم قهوه نهايتها جهنم !

      هنا فقط !

      قهوه ثم ابتسامه ثم مكالمات ثم زنا ثم سحر ثم امباااااااااع ضاااااع !
      حملة تنظيف بلادنا من المغربيات حسبي الله ونعم الوكيل انشروا ولا تترددوا الله يحفظ بلادنا يارب من المغربيات الساحرات الدجالات إلي يخربون بيوتنا انشرو عشان الناس تعرف من راعي السحر والدجل

      برودكاست الله لا هانكم خلونا نفتح عيون المسؤولين عسا يوقفون تأشيراتهم ويفكونا من سحرهم وارفهم

  9. طبعا الزوج يحب الزوجه تتطبخ وتتزين وتلبس احلي لبس ودايما تكون بشوشه معاه مب كلما رجع البــيــت اكشر بويها اكيد الريال بيشرد ونفس الشي الزوج لازم يعطي الزوجه حقوقها هي بعد تربي وتتعب تبي حد يحس فيها ويفهما

  10. لحظة لحظة أسمعوني شوي ،
    كلكم ركزتوا على الريال المتزوج وانه يلجأ للمحرمات أو الزوجة الثانيه صح !
    السؤال هني ؟ ليش ما طريتوا الريال الأعزب ! ؟ ليش يلجأ للمحرمات ؟
    درينا المتزوج عشان يفتك من التحرطيم ويدور الراحة برع
    أنزين الأعزب شو عذره !
    ممكن حد يجاوبني

      • كلامك صيحيح أخوي الوطن

        نقدر نقول بعد انه بعض العزابيه اللي يلجأون للعلاقات المحرمة ناس ماديين يلجأون للرخص ! ما دروا انه بداية العلاقة رخص ونهايتها إفلاس ،
        العلاقات المحرمة بدايتها سهلة هات اللي عندك وبعدين ديون وإفلاس وسجون
        إرضاء الطرف الآخر بأي طريقة كانت

  11. ؏ طاري الطباخ
    آنـﮱـّآ اشوف ان الطبخ فن ومب ﮔل واحد يقدر يتقنه
    اذا الحرمه حاولت تطبخ ومهما حاولت مۓـْآ تنجح معاها وش تسوي

  12. ؏ طاري الطباخ
    آنـﮱـّآ اشوف ان الطبخ فن لا يتقنه اي شخص
    واذا الحرمه مهما حاولت تطبخ وما تنجح وياها وش تسوي

    • تراني قلت في هذا المقال وفي مقالات أخرى بعد !
      تسأل زوجها شو يبغي عشا ؟
      وفي مقال ثاني أن أهم شيء لنجاح الحياة الزوجيه كان الجواب .. الحوار

      يعني باختصار بالكلام ممكن كل واحد يعرف شو الأكلات لي تعيب الزوج وشو الأكلات لي تعيب الزوجه

      ولأن الموضوع يختلف من حرمه لحرمه ومن ريال لريال فما في طبخه وحده تناسب الكل .. والناس أذواق

      لكن عموما أي أكل يبدأ بمقبلات حلوه خفيفه يتبعها أكل جميل
      والسر في أن الواحد ما يحاول يشبع بسرعه و يتذكر أن في وجبه بعد المقبلات
      قد البدايات تكون متعجله لكن مع الوقت والكلام والحوار يتوصل الزوجين لعدة وصفات لأطباق شهية .. بإذن الله

    • صدقيني لو شافها تحاول و مافلحت تطبخله بيعذرها و يمكن يزيد قدرها عنده ﻷنها حاولت تسوي شيء هي ماتقدر تسويه ف العاده لكن سوته عشان خاطره

  13. الطبخ فن مثل باقي الفنون
    اذا الله لم يعطيها هذه الموهبه فلن تستطيع اكتسابها او تطويرها مهما حاولت

      • ياعمي انا انثى وماعرف اطبخ
        وحاولت وايد طبعا بش دايما افشل
        حدي بيض وفاصوليا
        العيوش والسويتات ماعرف اسويهن
        طبعا حتولت وايج واتبعت الوصفات و لكن لا احيد الطبخ وبصراحه ماحب اطبخ بعج كل هالفشل وتعلمت اني مب فنانه فيه

  14. اشكرك على الموضوع القيم..

    انزين سؤال اذا الرجل اساسا يحب اكل برع وانا ما اقصد اكل يعني سراط ويترس كرشته انا اقصد انه الرجل متعود على انه يحصل راحته برع واخر شي يبلي بنت الناس فقيره ويظلمها لانه هو اساسا شبعان من برع كيف بتسد يوعه الحرمه اللي بياخذها وانها توفرله كل شي وتريحه اخر راحه وكل اللي كان يشوفه برع شافه عندها وفوق هذا كله يقول بعدني يوعان .. خصوصا اذا السالفه فيها عناد مثلا اذا كان يحب وحده ورفضت تزوجه على طول يكلم هله انه يخطبولي بس عنادا في اللي كان يحبها وايي يوم العرس وياخذ الحرمه وهي ما تدري على شو ناوي واخر شي تكتشف انه وافق عليها بس عنادا في فلانه مب عشان خاطرها ويتم طول حياته يكلم اللي يحبها

    على العموم وايد طولت عليك

    • فعليا ما تفرق وايد فالنتيجه واحده

      وعند الزوجه واحد من ثلاث خيارات

      الأول تتطلق وتخرب حياتها الحاليه والمستقبلية
      الثاني أنها تعيش بقية حياتها وهيه تتحرطم وتموت وهي متغصصه

      والثالث وهو الأفضل طبعاً أن الزوجه تحاول تستعيد زوجها وحياتها وتعيش بقية أيامها في هناء وسعاده

      كيف؟ طبعاً بأنها تحاول تسرق زوجها من المنافسه لها في زوجها من صديقته عشيقته لي هيه واذا ما تقدر فهي وأقصد الزوجه فعلاً فاشله

      نصيحتي دائماً لا تعاملين زوجك كزوجك وعامليه كصديقك مثلاً وحاولي تكسبينه لك وتخطفينه من الاخرى وكل لي بتسوينه فهو أولا لمصلحتك دنيا وآخره وهو حلالك فاستمتعي فيه ولا تعيشين بقية تندبين حظك فأنت لا تعلمين المستقبل وبمحاوله بسيطه وعزيمه واصرار قد يتغير حالكم بإذن الله

      والخيار لك

  15. انا اول شي لسه متزوجه ليا سنه ونص وعندي ولد واحد يعني مزال جسمي ماتخرب من الولادة ومازلت مبينه صغيره وحليوة لكن مش عارفه ليش زوجي تاركني يتفرج ع افلام اباحيه ويشوف لي بنات في الشارع وديما يقارن فيا بغيري وانا ولله ولله مو مقصره معه بشي حتى احيانا اتنازل عن حقي عشان يرضى وهو ديما يرد فيا انا غلطانه انا ولله غلبت معاه يلي عندها نصيحه ليا تنصحني لوجه الله لأني صغيره في العمر 17 سنه وامي متوفيه وماعندي خوات ينصحوني

أضف تعليق