كالعاده نغير أشياء وايد لرمضان … لا اصبر أنزين ما بقول رب رمضان هو رب باقي الشهور … كأنهم يخبرونك شي ما تعرفه يعني يوم يقولون لك هالكلام … المفروض يوم حد يقولك جذه على طول ترد عليه … لا والله ما كنت أدري !
المهم أهم شيء بيتغير هو رنة التلفون … ما يحتاي من ضروريات الشهر
والناس والرنات في رمضان على ثلاث أحوال …
الأول: ما بيغير الرنه … لأنه بيحط التلفون على الهزاز فقط يوم بيسير المسيد … ويالله يود عاد يوم بيطيح دور المعلايه والناس تصلي وتدور الخشوع وخصوصا في النهار والمسيد صخه والبطن يغرغر من اليوع … أو شي ألعن مثل خمسين فلس … لا وطبعا ما بيحط أيديه في مخباه و بيسكره علشان يخيّل حد يعرف انه هالدق كان من تلفونه
الثاني: قوم بو الأناشيد والأدهى حد بعد بيحط أناشيد بالموسيقه … لا استوت السالفه … وإذا رن تلفونه يخليه يكمل أونه علشان يعرف كل المسيد انه ما شاء الله كله طوع حتى رنته نشيد إسلامي … وشي من الأناشيد أصلا تقول دور معلايه من كثر التصفيق والدق لي فيه.
الثالث: أصوات حيوانات وهذيلا عاد بعض المطاوعه … لأن الرنات حتى لو رنة تلفون عاديه فهي من الموسيقى ولذلك فهي حرام وطبعا مستحيل نشيده فيحطون أصوات حيوانات … وفجأة وأنت تصلي وإللا يصقع ديك عدالك ويخليك تقفز … أو قطو تسمعه وأنت ساجد وتتحسبه الحين بينط فوق راسك … وين نحن أخواني في المزرعه وإللا شو السالفه .
أتمنى ويا كثر أمنياتي … ان يحط الناس رنة تلفون عاديه مثل رنة التلفون التقليديه “الكلاسيكيه” وصدقوني حتى لو نسيت تحطه على الهزاز … عادي مجرد رنة تلفون
أهم شي وأتمنى ان تخبرون أكبر عدد ممكن بهذا الشي لأن وإيدن ما يعرفون … إذا رن تلفونك … فحركتك لإيقاف الرنه لا تبطل الصلاة ، حتى لو طلعت التلفون من مخباك وطلعته من الغطاء ودخلت الاختيارات وحولته صامت فلا يبطل الصلاه … بس لا تفتح وتقرأ المسجات ..
الله يوفقكم للطاعات في شهر الجود والخيرات
مع تحيات:
الــــــــوطــــــــن™
اتبعني Follow @AlWatanUAE
www.alwatan.ae
الـكـشـكـول 
هههههههہَ
ما احب حد يرن فونه بالمسيد يم التراويح
حتى بالجامعه إذا علي اختبار ورن فون اي شخص او حتى مجرد هزة محسوسه ما احب احس يشتت الواحد
بس بالاوقات العاديه يفضل الرنه الكلاسيك